Viksit Mizoram nih hmasak a ngai - Governor

Governor Dr Hari Babu Kambhampati chuan Independence Day vawi 78-na pualin thuchah a tichhuak a; India ramin kum 2047-a ram changkang (developed country) ni tura hma a lakna, Viksit Bharat tihlawhtling turin Viksit Mizoram nih hmasak a ngaih thu a tarlang.

Dr Hari Babu Kambhampati chuan, PM-in kum 2047-ah Viksit Bharat nih an tum thu a puang tih sawiin, "Viksit Bharat kan neih theih nan Viksit Mizoram nih kan tum hmasak a ngai a, ram changkang nih kan tumna tihlawhtling tura theihtawp chhuah tur leh thawhpui atan Mizoram mipui zawng zawng ka sáwm," a ti.

Governor chuan, "Zalen­na sualtute an thil tum leh beiseina ram tih­hlawhtlin tumin an martar a, an inpekna hlu tak leh an thil tumte kha vawng nung reng turin kan zavaiin inhlan thar leh ang u," a ti a; Viksit Bharat leh Viksit Mizoram ti­hlawhtlingtu nih vek tum turin mipui a sáwm.

Mizoramah kum thum vel a awm tawh thu chhungin kawng hrang hrangah Mizoramin hlawhtlinna lian zawk a thawk chhuak thei tih a hmuh chian thu sawiin Larsap chuan, "Kan thiamna, theihna leh kan thil neihte hmang ṭangkaiin thil tam tak kan tihlawhtling thei tih ka ring tlat. Sum leh pai lama harsatna tâwk state kan ni a, resource mobilization pawh kalpui a awlai lo. Mipuite'n central sorkar hnuaiah social security scheme tam tak a awm tih kan hriat a ngai," a ti a; scheme hrang hrangte chungchang chu a kaihhnawih thuneitute leh bank hotute zawt ṭhin turin mipui a chah.

GOVERNOR THUCHAH ṬHENKHAT

▶ Mizoram tana hmasawnna ruhrel lian zawk din tiharsa tu pakhat chu inkalpawhna kawngpui ṭha tawk lo a ni.

▶ Central sorkar aṭanga kawngpui siamna tur sum tam tak kan dawng chunga kawng siam hna tam zawk kan zo hlei thei lo hi a pawi.

▶ Kan dam khawchhuahna kawngpui Vairengte-Sairang NH thlûr lia sial tur a la tangkhang phei hi chu a pawi zual.

▶ Bairabi-Sairang inkar rêl kawng siam zawh hun tur a nghahhlelhawm tak zet a, he rel kawng hian kan state hmelhmang a thlak danglam dawn.

▶ Atmanirbhar Bharat - India ram intodelh tura hmalakna atan hian sector hrang hrang aṭangin thâ kan thawh ve thei turah ka ngai.

▶ Kawlphetha hi kan intodelh theih, kan la tihhlawhtlin theih loh a ni.

▶ Central sorkarin subsidised rooftop solar scheme - PM Surya Ghar Muft Bijli a duan hi zir chiang ṭheuh ang u.

▶ Mizoramin remna hlu tak kan nei hi kan vannei a, a vawng nungtu ni tlat turin kan inngen nawn leh a ni.