Hnahthialah Hnahthial District Campaign

School Education department leh Samagra Shiksha hnuaiah Hnahthial District Campaign Committee chuan August 14, Nilaini khan Hnahthialah Education Reforms Campaign an buatsaih a, Education minister Dr Vanlalthlana khuallian niin, bialtu MLA Jeje Lalpekhlua khualzahawm a ni.

Education Minister chuan, Mizorama zirna siamṭhat nan Education Reforms Campaign kalpui a nih thu sawiin, campaign hmanga tih tur leh hmachhawpte a sawi a, "Zirna siamṭhat nan theihtawpa hmalak mek a ni," a ti.

Zirna inah infiamna hmanrua tihchangtlun tuma hmalakna a nih thu sawiin Minister chuan, "Zirlaite chhiar tur, zirtirna hrang hrang nei mai bakah, kan hnam ziarang pholang thei tur comics bute siam tum a ni," a ti a; sikul hrang hrangah zirtirtu sem rual a nih theih nan rationalisation kalpui tum mek a nih leh transfer & posting mumal zawka kalpui tum a nih thu a sawi.

Dr Vanlalthlana chuan, information technology hmangin zirna siamṭhat tum a nih thu sawiin, zirlaite'n a ṭha zawnga IT an hman thiam theih dan tur ngaihtuahpui turin zirtirtute a chah a; "Zirlaite hi top priority an ni a, zirtirtu'n zirlaite rilru sûkthlek mila zirtir thei turin tunlai khawvel changkanna mil zela inzir thar zel a ṭul," a ti.

MLA Jeje Lalpekhlua pawhin thu sawiin, Education Reforms Campaign hmasa ber Hnahthiala neih a ni chu lawmawm a tih thu a sawi a; zirtirtute chu an hna chu eizawn nan chauha hmang lo a, zirlaite hma hun hriltu an nih angin zirtirna lak thutak turin a chah.

Education Reforms Campaign hi Mizoram Education Reforms Committee (MERC) working chairman Prof. Lalbiakdiki Hnamte-in a kaihhruai a, School Education consultant Rev.Dr Thanzauva leh Hnahthial bawrhsap Rita Lalnunmawii Pachuau pawhin thu an sawi. Teacher resource package atan sikul hrang hrang hnenah tablet sem nghal a ni.