Buhfai metric ton 1,379.34 rawn pe

Mizoram ṭhenawm state leh ram aṭanga sahimna zawnga Mizorama rawn tlanchhia leh, khualrel chhiatna vanga in leh lo chán mi 45,000 vel ṭanpuina atan sorkar laipui chuan Mizoram hnenah cheng nuai 500 man buhfai metric ton 1,379.34 a rawn pe.

Mizorama raltlante leh khualrel chhiatna vanga in leh lo chánte tana buhfai pekna lehkha hi Mizoram sorkar chuan, Ministry of Home Affairs aṭangin August 14, 2024 khan a dawng. Buhfai hi ni 60 chhungin Mizoram Supply department-in Food Corporation of India hnen aṭangin an la chhuak thei dawn nia thu dawn a ni.

Buhfai pek chungchangah hian ZPM chuan thuchhuah siamin, khuarel chhiatna vanga in leh lo chánte leh raltlan mi ṭhahnem tak an awm avanga Mizoram buhfai mamawh a san thu, chief minister Lalduhoma'n August 6, 2024 khan sorkar laipuiah a thlen thu an tarlang.

Chief Minister thu thlen chu Food, Civil Supplies & Consumer Affairs minister B Lalchhanzova’n a bawhzui tih sawiin ZPM chuan, "MHA chuan Ministry of Consumer Affairs, Food and Public Distribution kaltlangin Mizoram sorkara FCSCA thuneitute hnenah sorkar laipuiin Mizoram tana a bika buhfai mamawh pek a nih thu hi ziakin an rawn hrilh ta a ni," an ti.

ZPM chuan, Chief Minister leh FCSCA Minister hmalakna chu ropui an tih thu an tarlang.