KHAWTHLIR

Home/centre tlawh

Excise & Narcotics minister Lalnghinglova Hmar chuan nimin khan Khawzawl district-a ruihhlo ngaite enkawlna hmun pahnih - Grace Camping Centre leh Chhanchhuahna Hmun a tlawh. Minister chuan home-a awmte chu beidawng loa nun ṭha zawk ûm zel turin a fuih a, kut hnathawh eizawnna lama an kal theih nan ṭanpuina pek a tum thu a sawi a; ṭanpuina Rs 10,000 a pe nghal. Home hnenah hian DC office-in Rs 2,000 leh SP office-in infiamna hmanruate an pe bawk.

Thisen pe

YMA Sub-Headquarters, Lunglei Youth Hostel chuan nimin khan Civil Hospital, Lunglei tan thisen unit 16 an pe.

US-a zir theih dan inhrilhfiah

Mizoram University chuan US Consulate General leh YRGCARE thawhpuiin August 14, Nilaini khan MZU auditorium-ah 'Experience America: Educational Opportunities in the US and Enhancing Student Mobility in North East' tih hun an buatsaih. Aizawla college hrang hranga zirlaite an tel a; US Embassy-a Aishwarya Mondal chuan US Consulate-in zirna lama hma an lak dante a sawi a, Education USA adviser Megha Roy Chatterjee-in US university-a zir theih dante a sawifiah. YRGCARE aiawhin Sandhya Krishnan-in thu a sawi bawk.

YMA-in in saksak

YMA, Zemabawk West Branch chuan nimin khan an venga khawsak harsa in tur an saksak bakah in dang pahnih an thawm ṭha a; hnatlangah hian YMA member 80 vel an thawk chhuak. YMA hnenah bialtu MLA Lalthansanga'n Rs 15,000 leh Zemabawk Local Council-in Rs 10,000 an pek bakah, mi inphalte hnen aṭangin pawisa leh bungrua eng emaw zat an dawng a ni.

Ṭanpuina inhlan

Zezaw Presbyterian Kohhran, Manipur chuan Mizorama Cyclone Remal tuarte ṭanpuina turin Rs 40,000 an thawh khawm a, nimin khan Manipur Group YMA hruaitute'n Central YMA hruaitute hnenah an hlan.