Medical college din tumna a kal tluang lo Health dept-in tihfel a nih thuai an ring

Mizorama medical college din tum, Mizoram Institute of Medical Education and Research (MIMER) atana Mizoram sorkarin proposal a siam chu Medical Council of India (MCI)-in an la pawm thei lo nia thu dawn a ni. Hetihlai hian Health department hotute chuan MIMER hi din a nih ngei tur thu an sawi.

Thu dawn danin, MIMER hi tuna State Referral Hospital, Fal­kawnah din tum a ni a, practical tihna atan Aizawl Civil Hospital (ACH) hman tum a ni. Falkawn leh ACH inkar hi km. 20 vel a ni a, mahse MCI inkaihhruainaah practical tihna leh college inkar kms. 10 aia hla lo tur a nih avangin tuna MIMER atana Mizoram sorkar rawtna chu MCI-in a pawm thei loa thu dawn a ni.
Health department hotute erawh chuan, MIMER project hi MCI aṭangin hnawlna a la awm lo tih sawiin, "Project lian tham a ni a, harsatna neuh neuh chu a awm. Mahse pawm loh a la awm lo a, MCI lam pawhin a hmunah an la rawn endik lo," an ti a; Mizoram sorkar leh sorkar laipuia Health & Family Welfare ministry a indàwr a, H&FW leh MCI an indàwr bawk niin an sawi.
Zawhna chhangin Health department hotute chuan, sorkar laipuiin Mizoram chu medical college nei turin an duhsak tih an sawi a, "Medical college dinna turin min thlang niin kan hria a, lehkha erawh kan la hmu lo. H&FW Ministry-in pawisa min pe dawn a, min pek hun kan nghak a, H&FW under secretary pawhin a hmunah a rawn en tawh," an ti.
Health department hotute chuan, State Referral Hospital chu MIMER atan an endik vek tawh a, thil chi hrang hrang awmna hmun turte pawh an thlang fel tawh tih an sawi a, "MCI duh ang hi kan neiin kan hria a, mahse ṭul leh tih ngai a la tam a, pawisa kan neih chuan kan ṭan theih lohna kan hre lo," an ti a; MIMER project-ah beidawnna tur a awm loh thu an sawi.
Health department-a thawkte chuan, Mizoramin medical college a neih avangin phai lam medical college hrang hranga Mizoramin seat a neih chu tihtawp a nih an rin loh thu an sawi a, "Medical college nei hmarchhak state dangte pawhin seat an la nei reng tho," an ti.
Health department hotute sawi danin, MIMER tur hi Mizoram University lamin an endik tawh a, kalpui zel turin an remti tawh. MIMER-ah hian a bul ṭan nan seat 50 awm tura tih a ni a, director tur pawh thlan tawh a ni a, mahse appointment pek a la ni lo. A bul ṭannaah hian Anatomy, Biochemistry leh Physiology department-te a awm ang.
Establishment of Medical College Regulations, 1999-in a sawi ang chuan, medical college dinna turin ram acre 25 aia zím lo neih a ngai a, land lease period chu kum 99 a ni tur a ni.
Medical inziah luhna tur university aṭangin pawmpuina lehkha neih a ngai a; medical college behchhan damdawi-in chu khum 300 aia te lo tur a ni a, mahse hmarchhak state-te chu khum 200 chinah ngaih­hnathiamin, khum 500 thlenga tihlen theih a ni tur a ni.