MNF-in VC leh LC an la tam ber

29th August, 2020

August 27, Ningania village council leh local council inthlana vote tlate chu chhiar zawh a ni tawh a, state sorkara rorel lai MNF party chuan VC/LC leh seat an la tam ber.

VC leh LC thlanah hian zing dar 7 aṭanga tlai dar 5 chhunga vote thlak tura tih ni mah se, hmun tam takah chuan hun tiam chhungin vote thlak zawh hman a ni lo a, zan dar 9 vela vote thlak zawh chauhna hmunte a awm. Vote thlâk zawh hnuah vote tlate chu chhiar nghal a ni a, hmun tam taka tlaivarin vote an chhiar a ni.

Ruahman dan chuan, inthlan hi Aizawla LC 83-ah buatsaih tum a ni a, mahse, Covid-19 vangin LC 24-ah inthlan theih a ni lo. Inthlanna local council 59-ah MNF party-in seat la tam berin, LC 50-ah hnehna an chang a, anmahni hnaih bertu Congress party chuan seat 84 lain LC paliah an chak a, ZPM party-in seat 21 lain, LC pakhatah an chak ber thung.

Tuivamit LC-ah chuan seat awm zawng zawng panga chu independent candidate-te'n an la vek a; Chawlhmun, Phunchawng leh Venghluiah chuan party mala chak ber an awm lo. Local council inthlanah hian voter 1,50,687 (mipa 70,200 leh hmeichhia 80,487) zinga 90,926 (mipa 42,519 leh hmeichhia 48,407)-in vote an thlak a, vote tla percentage chu 60.34% a ni.

VC result kimchang erawh chu nizan dar 8:30 thleng khan SEC aṭangin hriat theih a la ni lo a; MNF-in seat an lâk tam ber bakah, VC lak an nei tam ber. Nimin tlai dar 5:30 thlenga SEC-in result a tarlan chinah MNF-in seat 1,357 an la a, chu chu seat zawng zawng 2,408 aṭangin 56.35% a ni. Congress party-in seat 602, ZPM-in seat 255 leh BJP-in seat 20 an la a, independent candidate mi 174 an tling bawk.

Result hriat theih chinah Lunglei district-ah VC 113 zinga 54-ah MNF an chak a, VC 30-ah INC chakin, VC pariatah ZPM an chak. VC 20-ah party mal chak bik an awm lo a, Zodin VC-ah result la chinfel ngai a awm. Kolasib district-a VC 56 zinga 32-ah MNF an chak a, VC 11-ah INC chakin, VC pathumah ZPM an chak a, independent candidate-te chak tam berna VC pahnih a awm. VC pariatah erawh chuan chak bik an awm lo.

Mamit district-a VC 90-ah seat 394 a awm a, MNF party-in seat 227, INC-in seat 112, ZPM-in seat 13 leh BJP-in seat 11 an la a, seat 31 chu independent candidate-te'n an la thung. Hnahthial district-a VC 30 zinga VC 21-ah MNF an chak a, VC pariatah INC chakin, ZPM leh independent candidate-te VC pakhat ve veah an chak bawk. VC leh LC-a sorkarna siam thei party-te hian September 4, 2020 hmain chairman/president, vice chairman/vice president, treasurer leh secretary an inruat tur a ni a; inthlan kaihhnawih thil zawng zawng chu September 7, 2020-ah zawh vek tur a ni.