Education Reforms Commission Report Tihhlawhtlin tum loah MNF-in sorkar puh

MNF ṭhalaite chuan nimin khan Aizawl Press Club-ah thuthar thehdarhtute an kâwm a; Mizoram sorkar chu Education Reforms Commission (ERC) report tihhlawhtlin tum loah an puh.

MNF ṭhalai president L Thang­mawia sawi danin, ERC hi May 8, 2009-ah din a ni a, July 1, 2009 aṭanga hna thawk ṭanin, July 2010-ah report an peih fel. Commission report hi zir chiang leh turin September 24, 2010-ah Group of Expert din a ni a, anni hian February 2011-ah Chief Minister hnenah report an thehlut a ni.

Group of Expert-in report an thehluh hnu hian April 6, 2011-ah committee pahnih - Task Force leh Monitoring Committee din a ni leh bawk.

L Thangmawia chuan, Mizoram mipui leh zirna veitute'n sorkarin ERC report a bawhzui dan an thlir reng nia sawiin, "ERC din hi ṭha kan ti a, opposition party lam aṭang pawhin kan sawisel lo. Mahse, tun thlengin an report tihhlawhtling tura awmze neia hmalakna a la awm lo. Chuvangin, tihhlawhtlin tumna tak tak tel loa Commission hi din niin a lang ta a ni," a ti.

ERC rawtnate an sawisel lo tih sawiin L Thangmawia chuan, "A vai vaia tihhlawhtlin theih a ni lo tih pawh kan hria. Sum sên ngai loa tihhlawhtlin theih pawh tihhlawhtlin tum a ni chuang lo," a ti a; Group of Expert-in report an thehluh hnuah report rawtna tihhlawhtlinna tur kawnga ruahmanna awmze nei budget-ah telh a la ni lo tih a sawi.

MNYF President chuan, ERC rawtna ngai pawimawh si loin, zirna kaihhnawihah thil lian tham tak sorkarin a buaipui chiam tih sawiin, "ERC rawtnaa tel miah lo high school-a mathematics optional-a dah tuma hmalakna thui tak a kal hman a ni. Syllabus-te pawh duan fel hman a ni a, a hmáwrbâwk hma deuhin kalpui chhunzawm lo tura thutlukna siam leh a ni," a ti.

Sikul kai hun tihhma pawh ERC rawtnaah a awm lo tih sawiin, L Thangmawia chuan, zirna siamṭhat nana thil ṭul tak chu ni se, ERC rawtnaah telh a nih a rin thu a sawi.

L Thangmawia chuan, zirna siamṭhat chu ram tana thil pawimawh tàwpkhâwkte zinga mi a nih thu sawiin, "Mizoram sorkarin world class education min tiam a, hetianga min kalpui zel a nih chuan world class education nêp ber min thlenpui dawn a ni," a ti a; sorkar chu a behbâwma kual lo a, ERC rawtna tihlawhtling tura chak zawka hma la turin a ngen a ni.