MLA hluite'n tuihna humhalh an zirho

Former Legislators Association of Mizoram (FLAM) chuan, nimin khan Assembly Annexe conference hall-ah ‘Water Conservation’ tih thupui hmangin seminar an buatsaih a; PHE minister Zodintluanga'n a hmanpui.

Zodintluanga chuan, Mizoram chhung hmun tam takah tuihna a kang nasa tih sawiin, "Thing­tlang khaw tam takah ṭhál­-­vaekchâr lai pawha tui­hna kang ngai lo kan neih ṭhinte kha tunah chuan a kang chat zawh tak avang­in, tuihna humhalh hi tih tur pawimawh leh buaipui tham a tling. Lui leh kawr tui châwm­tu ṭha nei khuate pawh an tui hnár a kang nasat avangin khua aṭanga km. 20 vela hla aṭanga tui lakte a ṭul tawh a ni," a ti.

PHE Minister chuan, tuihna a kang chah nasat avangin PHE-in Central YMA nen thawhhona thuthlung ziakin, Mizoram hmun hrang hranga tuihna humhalh pawi­mawhzia inzirtir a nih thu a sawi.

SIPMIU kaltlanga scheme thar an buaipui mek thu sawiin Zodin­tluanga chuan, "Aizawl khawpui chhunga khelmual ṭhenkhatah tanky lian tak siam­in, fûr chhung­a tui in tur thiang­hlim hniang­hnar taka herh haw theih tur dah tum a ni," a ti.

FLAM president KL Rochama chuan, lui tui leh lei hnuai tuite a kang chak tih sawiin, "Tui loa awm thei lo mihring kan pung chak bawk si a, Mizoram din­hmun en hian water conservation chungchang ngaihtuah ngun a ngai ta hle," a ti a; tuihna kang mekte theih­tawp chhuaha humhalh leh a tihpun dan ngaihhtuah a ṭul tak zet thu a sawi.

Seminar-ah PHE executive engineer Lalrinzuala paper buatsaih zirho a ni.