Covid-19 laka hmalak dan tur sawiho

Lawngtlai Vengpui-II VC area leh Electric Veng VC area-ah Covid-19 positive pahnih hmuh chhuah a nih avanga Vengpui, Vengpui-II leh Electric Veng VC area-te containment area-a puan a nih chungchangah nimin khan Lawngtlai DC Dr Andrew H Vanlaldika hoin thuneitute an ṭhukhawm a; hmalak zel dan tur sawiho a ni.

Dr Andrew H Vanlaldika chuan, veng pathuma inkhuahkhirhna siam chuan zawm a hlawh ṭha tih sawiin, "VTF leh mipui thlàwpnaah kan lawm hle. Covid-19 kaihhnawiha district mipui him nan district administration bakah, Health department leh police-te'n theihtawp an chhuah avangin mipui tan hlauhthawn tur a awm lo," a ti.

Lawngtlai SMO Dr S Thaizi chuan, contact tracing an tih dan sawiin, an chhui zo tawha an hriat thu a sawi a, "Contact tracing aṭangin tuna positive hmuh chhuah thar pahnihte nena inhnìm hnai (primary contact) mi 132 chhinchhiah a ni," a ti a; VTF-te nen inbe rawnin, mi 132-te chu home quarantine vek an nih thu a sawi.

Lawngtlai DC chuan hriattirna chhuah nghalin, Lawngtlai Vengpui, Vengpui-II leh Electric Veng VC area-te containment area-a puan a nihna chu a hlîp nghal a ni.