MPCY-in YMA hêkah Chakmate an puh

MPC party ṭhalaite chuan, Central YMA-in Chakma chhiarpui neih an tum chungchangah Chakmate'n National Human Rights Commission (NHRC) leh Ministry of Home Affairs (MHA)-ah dik lo takin YMA an hêk nia sawiin, an dem thu an tarlang.

MPCY thuchhuah chuan, YMA-in Chakma foreigner-te dap­chhuahna tura chhiarpui neih an tum, Chakmate'n NHRC leh MHA-ah an hêk chu Mizoram sorkar leh ram mipuite an thamlohzia tihlannaa an ngaih thu a tarlang a, "Ram leilung fate dodal zawnga Chakmate inlulin hi engti kawng mahin rem kan ti thei lo a, kan ram humhim nan theihtawp kan chhuah zel dawn," an ti.

Political party ṭhen­khatte'n Chakmate vote an duh vangin tun­ah chuan Chakmate'n Mizote chalah chil an hnawm ngam ta nia sawiin, MPCY chuan, A thangtlawmthlak kan ti tak zet a. CYMA-ten Zofate hmakhua ngaia kan ram thenfaina tura Chakma chhiarpui neih tuma an hmalakna hi a tawp thlengin kan thlawp dawn a ni," an ti.