CYLA bandh siamah thupha an chawi

Central Young Lai Association (CYLA) hruaitute chuan nimin khan an office-ah thuthar thehdarhtute an kâwm a; Lai Autonomous District Council (LADC) chhunga ni li chhung total bandh an buatsaih vanga mipui laka harsatna an siamah thupha an cháwi tih an sawi.

CYLA president V Vanlalianhrin chuan, total bandh an buatsaih chhungin mipuite thlawpna an dawn ṭhat thu sawiin, "Mahni harsatna leh tawrhna hrang hrangte hai der luiin, kan ram leh hnam tan tiin LADC area-a mipui mimirte'n bandh hi an thlawp a, an mi thlawpnaah thinlung takin lawm­thu kan sawi a, harsatna mipuitea kan siam zawng zawngah thupha kan chawi a ni," a ti a; total bandh chu sorkar tihmualpho tumna leh runluihna a ni lo tih a sawi.

CYLA hruaitute chuan, total bandh an buatsaih chhan pahnih - Lung­lei leh Lawngtlai inkar kawng siam leh Lawng­tlaia P&E division dah chu tihhlawhtlin a nia an hriat thu sawiin, sokar chungah lawmthu an sawi.

An thil phût zinga pakhat, World Bank sum hmanga kawng laih tur Samang tlangdung paltlangtir loh chungchang sawifiahin V Vanlianhrin chuan, "Kan duh dan anga Lawngtlai by-pass lo tura kan hmalakna kha a kal zel a, amah­erawhchu, he kawng chungchangah hian kan ram chhung mai ni lo, Aizawl district aṭanga alignment rawn kal a ni a, he kawngpui hian LADC area hi a kawng tâwp lam chauh hian a rawn hrût a, kan thil hriat tlai avangin thui tak hmalakna a lo kal tawh a ni," a ti.

V Vanlianhrin sawi danin, kawng laih tur hian LADC area bikah alignment final approval pek a la ni lo a, hemi chung­changah hian LADC hotute pawhin resolution siamin zir chian an tum a ni. Sorkar hotute pawhin CYLA hruaitute biain alignment hi zir chian a, a ṭul anga hmalak zui an tiam a ni.