Hnahthial Lungleng Veng mipuite MGNREGS hnuaiah inhlawh dawn lo

Hnahthial Lungleng Veng Joint Action Commit­tee chuan thuchhuah siamin, Hnahthial South-III VC siam tharah Lungleng Veng ṭhendarh a nih an duh lohna kal zelah MGNREGS (ni 100 inhlawhna) hnuaia inhlawhna chhuak chu thawh loh an tum thu an puang.

MGNREGS hnuaia inhlawhna awm tur chungchangah hian Hnahthial Lungleng Veng JAC chuan October 18, Pathianni khan vantlang inkhawm an ko a, job card neite an tel. "VC pakhat huam chhunga kan veng pumpui kan awm theihna tura kan ngenna kal zel atan MGNREGS thawh hnihna lo chhuak hi lungrual takin thawh loh ni se," an ti.

Vantlang inkhawmah hian MGNREGS hnuaia inhlawhna thawh leh thawh loh chungchangah ballot paper hmangin vote an thlak a, inhlawh lo turin thutlukna an siam. An thutlukna chu sawisel lo leh phunnawi loa zawm vek tih lantir nan bán pharin an nemnghet a ni.

Hun kal zelah MGNREGS hnuaia inhlawhna thawh leh thawh loh chungchang chu vantlang inkhawma rèl thar leh turin an thu an dah a; khawtlangah harsatna tâwk leh ṭanpui ngai an awm chuan khawtlangah thawhlawm khawn an rél bawk.