Mizorama Covid-19 vei Mi 1,000 an chuang ta

August 27, Ningani khan Mizoramah Covid-19 vei mi 29 hmuh chhuah belh a ni a, Mizorama hripui kai tawh chu mi sang khat an chuang ta. Hetih lai hian, nimin khan hripui vei dam tawh mi 14 chhuahtir an ni thung.

Ningani khan ZMC laboratory-ah RT-PCR khawl hmanga mi 514-te swab sample endikah Covid-19 vei mi 26 hmuh chhuah a ni a, Lunglei Civil Hospital (LCH) laboratory-ah TrueNAT hmanga sample 43 endik zingah mi pakhat leh hmun hrang hranga Rapid Antigen Test (RAT) hmanga mi 521 endik zingah mi pahnih hmuh chhuah a ni bawk. Hetih lai hian, nimin khan Covid Care Centre (CCC) - SIRD, Lunglei Pûkpuia enkawl zinga BSF sipai panga, Zokhawsang CCC aṭangin Assam Rifles mi pathum, Berawtlang CCC aṭangin BSF pakhat leh SRH-ZMC aṭangin mi panga (mipa pathum leh hmeichhia pahnih) chhuahtir an ni. ZMC aṭanga chhuak zingah hian mipa naupang kum 7 mi a tel.

Mizoramah Covid-19 vei March 24, 2020-a hmuh chhuah a nih hnuah August 27 thleng khan mi 1,003 hmuh chhuah a ni tawh a, mi 514 (51.25%) chhuahtir an nih tawh laiin, la chhuak lo mi 489 (48.75%) an awm. La chhuahtir loh zingah hian hripui vei tawh lo (negative tawh) an awm nual nia thu dawn a ni.August 27-a ZMC Covid-19 laboratory-a hripui vei hmuh chhuahte chu Aizawl district mi vek niin, mipa 23 leh hmeichhia pathum, kum 20-68 inkar an ni a, an zinga 10 chu Mizoram chhunga kái chhâwng (positive contact) an ni. Sorkar thuchhuah tarlan danin, Mizorama kái chhâwng zinga pathum chu Aizawl Venglai LTF-a tel, mipa puitling an ni a; pahnih chu Bawngkawna mipa kum 69 leh hmeichhia kum 35, Zangena Filling Station-a Covid-19 positive chhuina kal zela endik an ni. 

Zangena pump aṭanga kai nia hriat tho Saipûma duty police aṭanga kái chhâwng nia hriat Zemabawk mi pali (mipa leh hmeichhia pa­hnih ve ve) an tel a; pakhat dang chu Assam Rifles mi kum 28-a upa, Zokhaw­sanga awm mek a ni. An vaiin Covid-19 vanga harsatna (symptom) an nei lo. ZMC-a Covid-19 vei hmuh chhuah dang 16-te chu state páwn aṭanga tun hnaia rawn lût, mipa vek, kum 23-44 inkar an ni a, quarantine facility-a awm lai vek an ni. An zingah Mizo sipai chawlh laa lo haw pasarih an tel a, Assam Regiment panga leh Indian Navy-a mi pahnih an ni. An zingah Covid-19 symptom nei pathum an awm.

LCH laboratory-a Covid-19 vei hmuh chhuah thar awm chhun chu mipa kum 37 mi, tun hnaia Guwahati aṭanga rawn lut, khung hran lai a ni a; RAT hmanga hmuh chhuah thar pahnih chu Mamit district-a mipa kum 22 leh 27 mi, Kolkata aṭanga rawn haw an ni. LCH leh RAT hmang-a hmuh chhuah zing­ah h­arsatna nei an awm lo.