HIV veite'n MSACS official aṭangin Endawng leh thinhrik niin an inngaiHIV veite'n MSACS official aṭangin Endawng leh thinhrik niin an inngai

September 23, 2020 khan NACO, UNAIDS, CDC, Manipur, Mizoram leh Nagaland aṭanga State AIDS Control Society (SACS) hotute'n virtual meeting an nei a; HIV vei pawl, nawhchizuar leh anpui kawp aiawhte pawh an tel. Meeting-ah hian MSACS hotu pakhat chuan HIV veite deusawhna ṭawngkam a hmang niin MiSNoPP, PWNM leh MDUF-te chuan an tarlang.

Pawl pathumte'n MSACS official thusawi an tarlan chu - 'Zunthlum, cancer leh BP sangte man cháwia an inenkawl laiin, HIV positive-te chu a thlàwna damdawi dawng an nih avangin an lawm ngawih ngawih tur a ni,' tih a ni.

MSACS official thil sawi chu ART centre thawkte'n HIV vei, ruihhlo hmanga a inchiu ṭhin avanga a damdawi lâk lai an tihtawpsak avanga HIV veite lungawi lo a chhànna a nia sawiin pawl pathumte chuan, "HIV positive-te'n harsatna kan tawh min hriatsaktu tur berin hetiang tawngkam a hmang hi pawi kan ti a ni," an ti.

MiSNoPP, PWNM leh MDUF-te chuan, HIV veite aiawha MSACS-a post awmchhun GIPA (Greater Involvement of People Living with HIV/AIDS) coordinator post chu kum nga kal ta aṭanga tun thlengin hup bo a niin an tarlang a; HIV/AIDS Act, 2017-in a phût angin MSACS-ah GIPA coordinator post a rang lama hnawhkhat turin sorkar an phût tih an sawi.

Pawl pathumte chuan, MSACS hotute chuan HIV vei mekte dinhmun an hrethiam tak tak lo nia an hriat thu leh virtual meeting-a HIV veite rilru tina zawnga thu sawitu chungah rinna an nghah ngam tawh loh thu an tarlang a, "A chunga tarlan MSACS official aiah officer rintlak, community-te dinhmun leh mamawh hrethiam, an right vawnghim leh chhawm nung theitu tur leh, ART chatlak lo tura hma la thei tur dah turin sorkar kan phût," an ti.

MiSNoPP, PWNM leh MDUF-te tarlan danin, Mizoram chu India ramah HIV vei (prevalence) tamna ber state a ni a; kum 2017-a HIV Estimation Technical report-ah state mipui zinga 2.04%-in HIV veiin, India rama sang ber a ni. Kumin March-July inkarah phei chuan mi 19,471 endik zingah HIV vei mi 833 an awm a, prevalence rate chu 4.3%-ah a kai a ni.