S.Korea palai leh CM Hawla inkâwm Inlaichinna tha neih dan tur an sawi

India rama South Korea palai (ambassador) Joongyu Lee leh chief minister Lal Thanhawla-te chu Thawhlehni zan khan CM bungalow-ah an inkâwm a, Korea leh Mizoramin inlaichinna ṭha a neih theih dan tur an sawi dun.

Joongyu Lee chuan Mizoram a tlawh chhan sawiin, "Korea leh Mizoram inlaichinna tichak tura lo kal ka ni. Tun ṭum hi a bul ṭanna tur chauh a ni," a ti a, Mizoram leh Korea inlaichinna atan tih hmasak atan cultural programme exchange a rawt.
Chief Minister chuan, Mizo­te chu inpawh tak leh intluktlang hnam an ni tih sawiin, "Ei leh barah leh sum leh paiah intodelh hi kan duh ber a ni. Hemi atan hian sorkarin NLUP kalpui mek a ni," a ti.
Korean ambassador hian nimin khan speaker Hiphei leh chief secretary Lalmalsawma a kâwm a, thil pawimawh hrang hrang a sawipui. Speaker chuan, Korean thiamnate chu Mizoramin chhawr ṭangkai thei se a duh thu Joongyu Lee hi a hrilh.
Joongyu Lee leh chief secre­tary Lalmalsawma chuan Mizoram lui aṭanga kawlphetha siamchhuahna kawnga thawhho dan tur leh mau sawngbawl dan chungchanga thawhho theih dan tur an sawi dun.
Joongyu Lee chuan, Korea ram chu 7% tlangram a ni tih sawiin, ramngaw chereu tawh an siamṭhat leh hnua agriculture lama an hmalak chhoh dan chu Mizoramin a hlawkpui ve ngei a rin thu a sawi.
Joongyu Lee hi political councillor Song Jin Hwa, Hyundai Engineering & Construction Ltd. chief project manager Joon Yul Yoo, Doosan Power System India Ltd. managing director Joon Kwan, Posco E&C India Pvt. Ltd. chairman In Hwan Ok, Korea Trade Investment Promotion Agency director Jinyong Shin, Korea Electric Power Corporation (KEPCO) managing director IIwhoan Chin leh, Time Tech Management Pvt Ltd. managing director Youngeun Song ten an ṭawiawm a ni.