Sorkarin scholarship atan Nuai 360 a pe chhuak

Mizoram sorkar chuan post matric tribal scholarship atan cheng nuai 360 an pe chhuak. Hetih lai hian, post matric scholarship atana sanction order-ah chuan Mizoram state sorkar tum tur chu cheng nuai 538.39 a ni.

Mizoram sorkar thu­chhuah chuan, "Nu leh pa an nihna hre rengin post matric scholarship aṭanga second installment dawn do letna atan cheng nuai 360 zet harsa tak chungin zirlaite hamṭhat­na ngaihtuah chungin a thehchhuak leh ta," tiin sorkarin scholarship atan pawisa a pek thu an chhuah.

Sorkar thuchhuah tarlan danin, internet leh power supply a tluan a, technical problem a awm loh chuan nimin tlai lam khan zirlai ṭhahnem tak account-ah pawisa a luh hman beisei a ni.

Hetih lai hian, post matric scholarship atana second installment sanc­tion order-a tarlan danin, kum 2014-15 atana post matric tribal scholarship sum ruahman zawng zawng chu cheng nuai 5383.88 a ni a; sorkar laipuiin a tum tur chu cheng nuai 4845.49 niin, a bak cheng nuai 538.39 chu Mizoram sorkar tum tura tih a ni. Mizoram sorkarin sum a pek chhuah kim loh chu cheng nuai 172.39 a ni.

Sanction order-ah chuan, post matric scho­larship dawng thei tur teh­fung siam ngaih pawimawh tura tih a ni. Post matric scholarship dawng thei tura tehfung pakhat chu - zirlai nu leh pate kum khata sum lak luh Rs. 2,50,000 tling lote an ni.