KHAWTHLIR

Zoram Ni
MZP chuan vawiin hian I&PR Auditorium, Aizawlah 'Zoram Ni' tia an vuah chu an hmang dawn. Zoram Ni hi India sorkarin kum 1966-a jet fighter hmanga Mizoram a beih ni, March 5-ah hman ṭhin a ni a, kum 2008-ah hman ṭan a ni. Kuminah hian thupui chu ‘Ram leh hnam hmasawnna kawnga mipui leh ṭhalaite mawhphurhna’ tih a ni a, thupui hi Vanglaini editor K Sapdanga leh Aizawl West College-a zirtirtu Dr Samuel Vanlalthlanga ten an sawi ang.

Mizo Upa Pawl
Mizo Upa Pawl headquarters, Lunglei chuan nimin khan Saikuti Hall-ah General Assembly vawi 41-na an hmang a, Chalrosanga Ralte, MLA khuallian a ni. Mizo Upa Pawl hi Lung­lei district-a upa pawl a ni a, Mizoram Upa Pawl nen pawl hrang an ni. Nimina an Assembly-ah hian Chalrosanga Ralte chuan Rs. 5,000 a pe a ni.

Chetsualnaah thi
March 3, 2015 zan dar 9 vel khan Vaivakawn-Bazar Bungkawn kawngpuiah Bolero motor chesualin, kawng sira hmeichhe pahnih a hnâwl thla a; pakhat zawk Lalhriattir (32), Ramhlun South chu a hliam tuar loin nimin zing khan Aizawl Civil Hospital-ah a thi.

Medal lawmpui
Mizoram State Sports Council chuan nimin khan an office-ah tun hnaia inelna hrang hrang­a Mizoram tana medal latute lawmpuina hun an buatsaih a, Mizoram Youth Commission chairman T Sangkunga, MLA-in a hmanpui.

Hawla chawimawi
MHIP sub-headquarters, Serchhip chuan ‘The Mizo Marriage, Divorce and Inheritance of Property Act, 2014’ hman a nih avangin nimin khan New Ser­chhip YMA hall-ah chief minister Lal Thanhawla an chawimawi. CM Lal Thanhawla chuan, duhsakna thilpek hrang hrang a dawnah lawmthu sawiin, "Ka thil dawn tam ber chu sawichhiatna leh elrêlna a ni," a ti a; elrelna leh sawichhiat­na phur zo tur leh tuar chhuak turin Pathian a bêl tlat niin a sawi.