Zirlaiin kawngzawh an sawifiah

Aizawl City College Joint Students’ Union (ACCJSU) hruaitute chuan, March 2, 2015-a zirlaite'n kawng an zawh chu MSU bultum ni loin, ACCJSU bultum leh huaihawt niin an sawi a; a ṭul anga hmalak zel an tum thu an puang.

ACCJSU hruaitute hian nimin khan Aizawl Press Club-ah thuthar thehdarhtute an kâwm a; an president Rodingliana chuan, pre matric minority scholarship leh post matric tribal scholarship a kima pek phut vanga March 2-a kawngzawh chu a tìr aṭanga a tàwp thlengin ACCJSU ruahmanna niin an sawi a, "MSU hian college zirlaite kawng zawh turin min sáwm lo a, MSU chuan hma a lâkpui a, ACCJSU hmalakna a ni," an ti.

ACCJSU hruaitute chuan, an kawng zawh chungchang mi ṭhen­khatin political party hamṭhat lak nan leh party inchirh theh nana hman an tum chu pawi an tih thu an sawi a, "Kan thil phût chungchangah hian eng political party mah an inrawlh lo," an ti.