Mi pakhatin ration card a pe lut tawh

Food Civil Supply & Consumer Affairs (FCSCA) department ngenna angin, Mizoram sorkara officer zingah family ration card FCSCA-a thehlut a awm tawh. FCSCA chuan ration card thehlut tura ngenna chu ngawrh lehzuala kalpui an tum.

FCSCA department chuan, MLA, Ex-MLA, MDC, Ex-MDC, AMC councillor, gazetted officer, sumdawng hausa, contractor/supplier leh ration card hmang loa khawsa theite chu an ration card sorkara thehlut turin a ngen a; ration card chu mahni awmna hnai bera district civil supply officer (DCSO) hnena thehlut tur a ni.

Supply directorate-in report a dawn chinah chuan ration card hi P&E engineer-in-chief L Pachuau-in a thehlut tawh. Ration card thehlutte chu official document atan chauha hman chi ration card pek chhuah leh an ni ang.

Vanglaini palai zawh­na chhangin FCSCA department hotute chuan, ration card thehlut tura ngenna chu ngawrh leh zuala kalpui an tum thu an sawi a, "Village council inthlan avangin kan campaign ṭha ngam lo a, tunah chuan ngawrh takin kan campaign thei tawh dawn a ni," an ti.