Maxi cab-ah HIV+ve tan chuan man chanve
Mizoram Maxi Cab Owners Association (MMCOA) chuan, HIV natna kai (PLHIV) ten inenkawlna damdawi lam tura an zinnaah maxicab chuan man a zatve (50%) chiah lâk an remti.
Nimin khan MMCOA hruaitute leh MSACS project director Dr Lalmalsawmi Sailo chu a pisaah an inkâwm a; March 19, 2015-a MMCOA General Assembly an neih turah HIV chungchangah awareness campaign neih dan tur an sawiho a ni.
Dr Lalmalsawmi Sailo chuan, HIV inkaichhawnna tam ber mipat hmeichhiatna hman khawloh a nih thu sawiin, "Mi thurûk leh puanhnuai thil a nih avangin do a harsa em em a, mipui leh pawl hrang hrangte'n ṭangruala kan thawh a ngai a ni," a ti.