Durtlang kawng siamtha turin hmalak tum

Durtlang khuaa YMA branch pathum - Durtlang, Leitan leh Durtlang North branch YMA hruaitute chuan March 3, 2015 zan khan an khaw chhunga kawngpui chhe lutuk chungchang an sawiho a; kawng siamṭhat a nih theih nan hmalak an rel.

YMA hruaitu kalkhawmte chuan, Durtlang chu Aizawl khawpui huam chhung, AMC area a ni chungin an kawngpui dung chuan ngaihsak a hlawh lo bik hle niin an sawi a; kum 20 hma lamah tawh khan kawngpui zauhna turin kawngpui dunga awmte'n an ram an pe tawh tih sawiin, "Khawpui chhunga kawngpui atana hmun zuah zau ber an ni hial a, heti chung hian khaw kár kawng ang maiin, metal phah chin motor pakhat leng tâwk chauh a la ni reng," an ti.

Durtlang YMA-te chuan, an kawngpui chu metal chin a zîm bakah, a chhe hle tawh niin an sawi a, "Lirthei mai bakah kawngpui dunga kal vel tan pawh harsatna namenlo kan tawk tawh ṭhin a," an ti a; ṭhál laiin a khu em em a, fûrah a diak hle bawk niin an sawi.

Durtlang YMA-te tarlan danin, Durtlang khaw chhung kawngpui hi NGO te, bialtu MLA leh AMC-a bialtu councillor leh local council-te'n siamṭhatna turin hma la ṭhin mahse tun thlengin siam a la ni lo a; BRTF aṭangin Mizoram PWD kuta dah mai tur anga an sawi laiin, tun thlengin BRTF enkawl a la ni.

Durtlang khawtlang hruaitute chuan, thuneitute'n veng mipuite dik tâwk lo hmangin an báwlzãn ṭhin nia sawiin, an ngaihthiam tawh loh tak zet thu an sawi a, "Kumin fûrpui thlen hma ngeia kan kawng dung, Aizawl khawpui veng dangte anga enkawl/thawm ṭhat a nih loh chuan, veng mipuite'n kan remhriat danin hma kan lak a ṭul ve dawn ta a ni," an ti.

An hmalak chhohna turah Durtlang kawngpui dung paltlanga zin veivak ṭhin zawng zawng te, sumdawng te, veng chhunga university, college leh pisa kái ṭhinte'n harsatna an tâwk a nih pawhin, hrethiam hrâm tur leh ṭawiawm turin an ngen lâwk a ni.