Inthlan result-ah party-te an lâwm

August 27, Ningania village council leh local council inthlan result puan tawhah political party-te chuan an party ṭheuh dinhmunah lawmawm an tih thu an sawi.

Vanglaini palai zawhna chhangin MNF vice president Vanlalzawma chuan, VC leh LC inthlan result chu an party tan a lawmawm thu a sawi a, "VC kan lak tam berte chu ka beisei a, tiang em em hi chu ka beisei pha lo," tiin, VC leh LC inthlanah tun anga political party malin hnenhna an chan tam a la hriat loh thu a sawi. Vanlalzawma chuan, an party-in hnehna an chan tam chhan chu mipuiin MNF kaihhruai sorkar hmalakna ṭha an tih vang nia a hriat thu sawiin, "Mipui hian sorkar hmalakna ṭha an ti a, la ṭawiawm zel an châkah ka ngai," a ti.

MPCC treasurer Zodintluanga chuan Vanglaini palai zawhna chhangin, VC leh LC inthlanah an party chuan an beisei aia tam seat an lâk thu a sawi. Zodintluanga chuan, minister-te vauna hnuaiah, opposition VC-te chawhmeh híng nena an tehkhinna hnuaiah pawh Congress party tamzia a la lan thu sawiin, "Seat kan lak zat chu thu hran ni se, kan tlin phâk lohnaah pawh vote tlemtê tê chauhin kan tling zo lo a ni. Chu chuan kan party phûrzia leh vote kan ngahzia a tichiang hle," a ti.

Congress an chêt ṭhat chhan chu kum khat leh a chanve vel chhunga sorkar kalphung mipuite'n uluk taka thlirin, an duh lohna an lantir nia a hriat thu, MPCC Treasurer chuan a sawi bawk. ZPM president Lalliansawta chuan nimin khan thuchah tichhuakin, VC leh LC inthlan an chuh hmasak bera seat ṭhahnem tak an chang nghal thei chu lawmawm a tih thu a sawi a, "Kan ramah hian thlei bik nei loa rorelna kan mamawhzia leh party induhsakna tihtawp a hunzia kan hre thar leh niin ka hria. Party bik rorelna hian hmasawnna hnathawh tur a dîp ṭhinzia pawh a lang chiang hleah a ngaih theih a ni," a ti.