Advertisement chhuah loa sorkar hna lak a awm ngai lo: Congress party

Congress party chuan thuchhuah siamin, chief minister Lal Thanhawla kaihhruai sorkarah adver­tisement chhuah loa sorkar hna lak a awm ngai lo niin an tarlang a, "Tun hmaa kan hriat fo, advertisement chhuah loa duhsak zawngte hna pek mai mai ang kha tun sorkarah tih a ni ngai lo," an ti.

MPCC thuchhuah chuan, Lal Thanhawla kaih­hruai sorkarin hma­sawn nan nasa takin hna a thawk mek nia sawiin, "Sorkar department hrang hrangte pawhin hna chak taka an thawh theih nan hma a la mek zel a ni," a ti a; thawktu lakah sorkarin dik takin a ti ṭhin niin a sawi.

Congress party chuan, Mizoram Public Service Commission-in felfai takin exam leh interview a buatsaihin a tling leh tlakte chauh sorkar hna thawk turin lak an niin an sawi a; April 2013 aṭanga February 2015 inkarah MPSC-in sorkar hna thawk tur Group A-ah mi 286, Group B mi 276 leh Group C mi 1, an vaiin 573 a la thar niin an sawi a ni.

MPCC chuan, NLUP hmangin chhungkaw tam tak bul ṭansak an ni tawh tih an sawi a, "Mahnia eizawnna ngêlnghet an neih mek laiin, lehkha thiam leh sorkar hna zawng laite tan pawh hna tam tak siamsak an ni tawh," an ti a; kuthnathawkte leh lehkhathiamte tan sorkar chu belh tlak a nih thu an sawi bawk.