BJP bill CAB thlawp hi Mizo mipui duh dan kalh a ni - MPC President

Mizoram Peoples' Conference (MPC) party chuan nimin khan kum 2020 atan an pisa an hawng ṭan a; hawnna inkhawmah MPC president Lalhmangaiha Sailo chuan, thusawiin Citizenhip Ammendment Bill (CAB) bûk a nihlaia Mizoram Kristian MP-in Lok Sabha-a a thlawp chu Mizo mipui duh dan kalh a nih thu a sawi.

CAB/CAA chung­changa MNF sorkar hmalak dan demin Lal­hmangaiha chuan, "Mizo MP tiamin CAA ni tura pass a ni kha a pawi tak zet. Mizo mipuite'n duh loa kan dodal chhan ber pawh sakhaw hmanga inthliarnain citizenship pek theihna a nih vang te, India danpui Article 14 leh 15 bawhchhiatna a ken tel vangte a ni," a ti a; India ramah independence hnua a vawi khatna a nih thu a sawi. MPC president chuan, "Kristian Lok Sabha MP kaltlanga BJP bill kan han thlawp ta tlat mai leh MP thlavâng hauhna ni âwm taka pawlin kan vote tir a ni, an ti zui phei hi chu Mizo mipui duh ang leh tum ang a ni lo hul hual a ni tih MNF party hian hria se ka duh," a ti a; CAA thláwptu state-a Mizoram a lang ve reng tawh tur chu pawi a tih thu sawiin, "Constitution secularism democratic principles thlirna aṭangin kan sorkar hian CAA an thlàwp chhan sawifiah turin ka phût a ni," a ti.

BJP sorkar chet dan chu minority tana an hlauh­awm thu leh, Mizote tan BJP chu thlawp chi a nih loh thu a sawi. Kum 2020-ah PRISM party nen inpumkhatna nei turin remchang ṭha tak a awm thu sawiin, kum 2020 chu MPC-in chuan 'Grand Revival' kumah an puan thu leh, an beisei a san thu a sawi. Inkhawm hi MPC vice president Chalthangluaia'n a kaihruai a ni.