Mizorama VC-te sum dawn tur Vbc. 93 zinga a zatve thleng tawh

Ministry of Panchayati Raj chuan 15th Finance Commission rawtna angin kum 2020-21 atana Mizorama village council-te hnena khawtlang hmasawnna hna thawhna turin cheng vbc. 93 a ruahman tawh a, chu'ng zinga a zatve, vbc. 46.50 chu a lo thleng tawh. VC inthlan zawhah hman ṭan theih tura dah a ni.

Vanglaini palaiin a kawmnaah Local Administration department (LAD) hotute chuan, Mizorama VC-te hnena hmasawnna hna thawhna tur sum chu sorkar laipuiin ṭum khatah vbc. 23.25 ve vea pein ṭum hnih a rawn pe tawh a, ṭum hniha a rawn pek belhkhawm chu cheng vbc. 46.50 a ni.

VC-te hna thawhna tur sum first instalment cheng vbc. 23.25 chu tied fund niin, tui hnianghnâr zawk neihna tur leh faina lam (water & sanitaion) atana hman tura ruahmansa a ni a; sum dawn a nih hnuah VC inthlan dawn vanga Model Code of Conduct hman a nih avang leh chhan dangte avangin sorkarin a la pe chhuak lo. 

VC-te'n an khawtlang mamawh dang an ngaihtuah hnua hna thawhna tur 'untied fund' atan sorkar laipui chuan tun hnai khan cheng vbc. 23.25 a rawn pe leh tawh. Untied fund-ah hian VC-te chuan an khawtlang hmasawnna tura thawh tur an duh ang an thlang dawn a, chu chu sorkara mithiamte'n an enpui ṭhin ang. VC-in hna thawhna tur sum an dawnte chu an hman dan tur mipuiin an hriat ve zel theih nan mipui rorelna (gram sabha) kaltlanga hman ṭhin tur a ni.

Sum hman dan tura 15th Finance Commission-in rawtna a siam ang chuan, state Finance recommendation-in a pawm dan hnuhnung ber ang zelin kalpui tur a ni a, mihring tam lam (population)-ah 90% leh ram zau zawng (area)-ah 10% zela pek tura ruahman a ni. VC-te sum dawn dan tur ruahman tawh niin, BDO kaltlangin hriattir vek a ni tawh. Finance department hotute chuan, VC-te hnena khawtlang hmasawnna hna thawhna tur sum, Ministry of Panchayati Raj-in a rawn pek chu VC inthlan zawhah pek chhuah tum a nih thu an sawi. Ruahmanna awm sa anga mihring tam dan (population)-ah 90% leh khaw ram zau zawng (area)-a 10% tih chungchangah harsatna a awm rih avangin, mihring tam dan azirin sum an pe rih dawn tih Vanglaini an hrilh.

Finance hotute sawi danin, Mizorama VC-te hnena sum pek tur cheng vbc. 93 chu budget-ah dah a ni a, Panchayati Raj ministry-in ṭum li pekah a pe tla ang. Mizoramah VC 832 a awm mek a, VC mal 

ṭheuhte hnena sum pek tur chu bithliah vek tawh a ni a, mahse, eng emaw vanga la tih fel loh a awm avangin khaw tinte sum hmuh tur zat an la puangzar thei lo.

VC-te'n hna an thawhna tur sum hmanga hmasawnna hna an thawhte chu a thlalak nen e-Gram Swaraj-ah dah luh (upload) zel tur a ni a; chutih rualin, VC ṭhenkhat tan internet signal lamah harsatna a awm theih avangin, VC 40 thlan chhin phawt a ni. Sum hi a hmanna tura ruahman sa ni lo, thil dangah hman theih a ni lo a, state sorkarin sum a pek chhuah tlai chuan pawisa chawitir dan pawh a awm a ni.