KHAWTHLIR

Nimin khan district hrang hrangah Assam leh Mizoram ramria buaina thleng vanga harsatna thleng theite sawiho a ni. Bawrhsapte chuan an district atan thupek chhuahin, thil zuartute leh sum­dawngte'n bungrua chheprelh emaw, lakna aia to uchuak emawa hralh loh tur a nih thu leh, a man pangngai (MRP) aia man toa hralhte chu dan anga hrem an nih tur thu an tarlang.

Mamit district magistrate Dr Lalrozama chuan, Thaidawr tlánga Songrongma hoin Shiv Mandir sak an tum vanga Cr.PC Section 144 hmanga Phuldungsei Zampui leh Zomuantlang chhehvela mi panga aia tam punkhawm khapna thupek chhuah tawh chu sût a nih thu, October 18 khan a tarlang. Thupek sût a nih chhan hi Songrongma hoin Shiv Mandir sak an tum an ṭhulh vang a ni.

State Referral Hospital-a Covid-19 vei enkawl mek zinga mi panga chu ICU-ah enkawl an la ni a, an zinga pakhat chu ventilator hmantir zel a la ni. SRH-ah hian nimin khan Covid-19 vei mi pakhat dah luh belh a ni a, ani nen hian mi 47 enkawl mek an ni. SRH-ZMC Bulletin chuan, ventilator hmantir tih loh ICU-a enkawl mi palite'n hma an sâwn hret a, Isolation ward-a awm mi 42 zingah ngaihtuahawm an awm lo tih a tarlang.

Bru Welfare Union India (BWUI), General Headquarters, Aizawl chuan thuchhuah siamin, Assam mite'n Mizoram chhung Thinghlun khuaa thlám an hâl leh huan thlai an tichhia te, Saihapui-V daia IR duty post an ṭhiatte chu an dem thu an tarlang. 

Nimin khan Lawngtlai DC Dr Andrew H Vanlaldika chuan Lai Autonomous District Council (LADC)-a Member of District Council (MDC) inthlana hman tur electoral roll ruahman chhin (draft electoral roll) a pisaah a tlangzarh a; draft roll chu political party aiawhte hnenah a hlàn nghal. Draft roll-ah hian voter 51,802 an awm a, kum 2015-a LADC inthlana voter awm zat 46,405 aṭanga a punna chu 5,397 a ni.