Chhiah lamah ram tan thâ Kan thawh ve a ngai: CM

Chief minister Lal Thanhawla chuan, Mizoram sorkarin mumal taka kal turin kum tin cheng vbc. 5000-6000 vel a mamawh tih sawiin, "Chhiah lamah ram tan thâ kan thawh ve a ngai a ni," a ti.

Nimina YMA sub-head­quarters, Serchhip office a hawn­nah thu sawiin Chief Minister chuan, "Cheng vbc. 5000-6000 vel kan mamawh laia cheng vbc. 300 vel thawhchhuah hi kum tin kan kal ṭhin dan a nih avang leh, sorkarin laipuiin sum eng emaw zat tum ve tura min phût ziah avangin, hun lo kal leh tur atan kawng sah kuak a ngai tawh. Chhiah lamah ram tan tha thawh ve a ngai a ni. State dang nena khaikhin chuan Mizote hi chhiah pe tlem ber zinga mi kan ni," a ti a; chhiah tihsan chu mipuite pawhin an hriatthiam a beisei thu a sawi.

Lal Thanhawla chuan, Mizoram mipui 70% chu lo neia eizawng an ni tih sawiin, "Loneitute hi kan ram hnuk an nih avangin mi hausa leh thiltitheite tlawn ngai loa an khaw buzawlah ngeia eizawnna ngêlnghet an neih theih nan NLUP changtlung zawk kalpui a ni," a ti.

Lal Thanhawla chuan, YMA-te chu khawtlang nun leh ram kalsiam khalh ngil kawngah hna ropui tak thawktu an ni tih sawiin, "YMA leh sorkar nen inhne rem taka an thawh ṭhinna chuan rah ṭha tak a chhuah mek a ni," a ti a; Mizoram leh khawtlang nun ṭhan zelna kawnga YMA leh sorkarin thawhhona ṭha tak an neih chu tichak lehzual a, sawhngheh zel a duh thu a sawi.

YMA sub-headquarters, Serchhip office hi Lok Sabha MP CL Ruala fund Rs. 27,00,000 leh YMA member-te thawhkhawm Rs. 1,55,945 hmanga sak a ni.