Scholarship thar dil theih an sawifiah

National Youth Wel­fare Association (NYWA) Delhi, Delhi Mizo Zirlai Pawl (DMZP) leh Society For Multi-Sectoral De­velopment (SMSD), Aizawlte chuan sorkar laipuiah zirlaite tan scholarship thar dil theihte sawifiahin; dil turin Mizo zirlaite an ngen.

Pawl pathumte hian nimin khan Ai­zawl Press Club-ah thu­thar thehdarhtute an kâwm a; NYWA hotu Gautam Thakur chuan, Central sorkarin hmarchhaka tribal zirlaite tihhmasawnna turin Ishan Uday Scho­larship a duang thar tih sawiin, hei hi academic session 2015-16 aṭanga kalpui ṭan a nih thu a sawi a, a ṭul angin NYWA-in an buaipuisak ṭhin tih a sawi.

SMSD president Joseph Malsawmtluanga pawhin, Ishan Uday Scholarship chu NDA sorkain a siam thar a nih thu leh Mizote'n an la hre tawk lo tih sawiin, zirlaite tana ṭha tak a nih avangin sil vek turin Mizo zirlaite a sâwm a ni.

Ishan Uday Scho­larship hi hmarchhak state-a tribal zirlaite tan bika siam a ni a; kum khata chhungkaw sum lak luh Rs. 4,50,000 tling lote tan dil theih niin, under graduate tan thla khatah Rs. 3500-5000 dawn theih a ni.

Online hmangin Ministry of Human Resource Development leh University Grants Commission website kaltlangin dil tur a ni a; March 15, 2015 thleng thehluh theih a ni.

Hetih lai hian, he scholarship hi tribal zirlai zawng zawngin hmuh tur chi ni loin zirlai 10,000-in an hmu ang. Ministry of Human Resource Development-in an pek tur a ni a; post matric tribal scholarship hmu tan pawh a hmuh kawp theih.

Ishan Uday Scholarship hmute tan Dr KN Modi University (Jaipur), RD Engineering College (Delhi-NCR) leh Hi-Tec Engineering College (Delhi-NCR)-ahte zirna fee chawi loin, hostel fee leh security chauh chawiin a zir theih tih an sawi bawk.

HRD Minisry prog­ramme siam thar dang, Ishay Vikas hnuaiah hmar­chhak zirlaite leh zirtirtute tan IIT, IIIM leh IISER-te nen intlawhpawhna hun siam a nih ṭhin thu an sawi a; he programme hmang ṭangkai duhte chu an ṭanpui thei tih an sawi.

HRD Mininistry-in Shaksham programme a siam bawk a, hemi hnuaiah hian pianphunga rualbanlo mi 1,000 hnenah tech­nical education atan scholarship an pe ṭhin tih an sawi a, "He scholarship hi merit base-a lak a ni a, tun thlengin mi 84 chauhin an la dil a, Mizo zirlai technical zir duh an awm chuan puih kan inhuam a ni," an ti.

Shaksham progra-mme-ah hian Rs. 30,000 tuition fee an dawng thei a, kum khata cheng nuai 6 la tling lo tan dil theih a ni.