KHAWTHLIR

Thisen pe
Sihphir Branch KṬP chuan, nimin khan an kohhran hall-ah blood donation camp an buatsaih a, Aizawl Civil Hospital tan thisen unit 21 an pe a, a petute mipa 20 leh hmeichhia pakhat an ni.

Ration card pe
Supply minister John Rotluangliana leh PHE joint secretary C Chawnghnuna chuan nimin khan DCSO East hnenah an ration card an pe lut (surrender). Ration card surender-ah hian 'For family document only' tih chhut a nih hnuah a neitute pek leh nghal a ni.

Photo Exhibition
Information & Public Relations department leh Mizo Photographers Society buatsaihin nimin aṭang khan Vanapa Hall bathlarah Photo Exhibition buatsaih a ni. Exhibition thupui chu 'Traditional' tih hman a ni a, Mizo hnam zia lam hawi thlalak 70 chuang pho chhuah a ni.

DC-in tlawh
Champhai DC H Lal­engmawia chuan nimin khan Champhai College zirtirtute leh zirlaite a tlawh a, college auditorium-ah inkhawm neih a ni. DC chuan, zirlaite leh zirtirtute chu ram tana rawngbawltu rilru pu chunga zirna kalpui turin a chah.

Heroin man
Aizawl SP hnuaia District Special Branch (DSB)-te chuan, March 4, 2015 khan Lalengmawii, Rangvamual hnen aṭangin heroin gram 69 leh ganja gram 448 an man a, Vaivakawn Police Station-ah thubuai an siamsak.

CM Relief Fund
Mizoram Secondary School Teachers Association (MISSTA) chuan nimin khan Chief Minister's Relief Fund-ah Rs. 10,000 an hlan.

BCM Assembly
Mizoram Baptist Kohhran rorelna sang ber, Assembly vawi 119-na, Lunglei Farm Veng Kohhrana neih mekah nimin khan rorel inkhawm ṭan a ni a, agenda ṭhahnem tak an ngaihtuah. Rorel hi vawiin leh naktukah an chhunzawm leh ang.