H/S zirtirtute'n sikul ṭan hma an thlâwp

Mizoram Secondary School Tea­chers Association (MISSTA) chuan thuchhuah siamin, Mizoram sorkarin sikul kai hun darkar khata sawn hma a tum chu ṭha an tih thu leh an thlawp thu an tarlang a; sikul ṭan hma ṭha an tih thu hi nimin khan School Education minister H Rohluna an hrilh.

MISSTA office bearer-te chuan nimin khan School Education minister chu a pisaah an kâwm a; zirna kawnga sorkar hmalakna chi hrang hrangte ṭha an tih thu leh beiseina sang tak an neih thu an sawi a ni.

Minister H Rohluna chuan, Chief Minister-in zirna a ngaih pawimawh avangin a tih theih chin chin chu a tihsak zel tih sawiin, RMSA, SSA leh midday meal-a Mizoram sorkar tum ve tur cheng vbc. 10 chu tun hnaiah tihfel a nih thu a sawi.

Sikul kai hun sawn hma chungchangah H Rohluna chuan, "School timing sawn hi a nghawng a ná tih hre sain, kan hnam nun tana ṭha tur a nih avangin Cabinet-in min pawmpui a ni. Keini aia darkar khata ni chhuak tlaite pawhin sikul an ṭan hma a, an thawh chhuah hma avangin an thawk hlawk nge nge a. Keini pawh kan thawh hlawk phah ngei kan beisei," a ti.

Parliamentary secretary Joseph Lal­himpuia pawhin, zirna vanga ramin hma a sawnna a sang hle tih sawiin, "Zirtirtu pahnih khat lek awm dan dik loin zirtirtu hmel a tibâl ṭhin," a ti a; inspection chu School Education department chak lohna a nih thu sawiin, nasa taka ṭan an lak thu a sawi.