MZP bultumin Zoram Ni hman a ni

MZP huaihawtin nimin khan Aizawl leh Lungleiah 'Zoram Ni' tia an vuah chu hman a ni. Aizawlah chuan IPR Auditorium-ah hman ni­in, Lungleiah chuan DRDA Con­ference Hall-ah an hmang.

Aizawla Zoram Ni hmanna inkhawm hi MZP vice president Lalsangzuala Ngente-in a kai­hruai a, MZP president Lal­hma­chhuana'n thu a sawi. Vanglaini editor K Sapdanga leh Aizawl West College assistant professor Dr Samuel Vanlalthlanga ten thupui - 'Ram leh hnam hma­sawnna kawnga mipui leh ṭhalaite mawhphurhna' tih an sawi a, kalkhawmte'n an sawiho nghal.

MZP president chuan, Zoram Ni an hman chu Mizote hma lam huna hmasawnna a awm theih nana an tih a nih thu sawiin, political party hamṭhatna tur emaw, helh viau chhan tur emaw a awm loh thu a sawi a, "Ram leh hnam tana Mizo mipuite inhlan tharna níah hman kan duh vanga he ni hi sawiselna karah pawh hmang ṭhin kan ni," a ti.

Thupui sawitute hian Mizoram leh Mizote hmasawnna tur kawng hrang hrang an sawi lang a; kalkhawmte chuan, ram leh hnam hmangaihna tak tak nena ram kaihhruai a nih loh chuan Zofate tan káwl a êng theih dawn loh thute leh khawi hmunah pawh Mizo hnam tana rinawm taka awm a pawimawh thute an sawi.

Lungleia Zoram Ni hmanna chu MZP head­quar­ters, Lung­lei vice president Lal­ram­muan­awma'n a kai­hruai a, president Ben­jamin Vanlalfela'n thu a sawi. MAL Lunglei secretary TC Jonunsanga'n 'Rambuai laia Zofate tuarna' tih a sawi a; Lunglei MZP hruaitute zinga mi Lalnunsanga Renthlei-in 'Zoram Ni hman chhan leh a pawimawhna' tih a sawi bawk.

Zoram Ni hi MZP huaihawtin kum 2008-ah hman ṭan a ni a; India sorkarin kum 1966-a jet fighter leh bomb hmanga Mizoram a beih ni, March 5-ah hman ṭhin a ni. Nimina Zoram Ni hmannaah hian zirlaite leh MZP-in tel tura an sawm bik mi ṭhahnem tak an tel a ni.