Mizorama hripui kái chhawng mi 10 awm belh Mi 3-in an kài ṭanna rin bik an nei lo

Mizorama Covid-19 hripui vei zingah Mizoram chhunga kái chhâwng an pun belh zel a, August 27, Ningania hmuh chhuah zingah pawh Mizorama kái mi 10 awmin, an zinga pathum chuan a kài chhan rin an nei lo. Mi 10 zinga pakuate awmna veng - Aizawl Venglai, Bawngkawn leh Zemabawkah nimin zing aṭang khan total lockdown puan nghal a ni.

Hetih lai hian, August 27, Ningania Zarkawt Local Council inthlana vote tlate Zarkawt Recreation Centre counting hall-a chhiartute zingah hripui vei nena inhnimhnaihna nei (positive first contact) a tel tih nimin zing khan hriat a ni a; chu mi chu swab sample endik tur niin, result a chhuah hma chuan counting hall-a lut zawng zawng chu ina inkhàrkhip tura hriattir an ni.

Mizoram chhunga Covid-19 kái chhâwng zinga pathum chu Aizawl Venglai Local Task Force (LTF)-a a kúl a taia ṭang, mipa kum 44, 45 leh 48 an ni a, an zingah LTF Secretary leh Aizawl Venglai Presbyterian Kohhran upa an tel. Aizawl Venglaia hripui vei hmuh tharte hian an kàina àwm rin an nei lo. Contact tracing emaw, rinhlelh thil emaw vanga endik an ni lo a, an veng mi, Zangena Filling Station leh Rangvamuala kalte leh Ramhlun South-a positive contact an neihte endik tura swab sample lak ruala sample lâktir ve an ni a; rinhlelh vanga endikte an negative laiin, rinhlelh ni miah lo pathum an positive ta zawk a ni.

An zinga pakhat chuan zawhna chhángin, "Harsatna kan nei lo. Covid-19 kài inringa test kan ni lo a, kài kan inring lo a, kan kàina awm pawh rin ka nei lo. Kan veng mi, test turte sample an rawn lâk nía duty kan ni a, a remchan avangin test ve kan dil a, LTF duty mi palite chu kan sample min lâksak ve a ni," a ti a; positive contact an neih àwm an hriat loh thu a sawi.

Positive contact tracing vanga Aizawl Venglai mi swab sample test result nghakte chu result a chhuah hma chuan chhuak lo tur leh LC inthlanah pawh vote pawh thlâk lo mai tura tih an nih avangin, anni pawh rinhlelh vanga endik ni lo mah se, an result a chhuah hma chu chhuak love tura an intih thu sawiin, "Keini pawhin vote kan thlâk lo a, nimin (Ningani)-ah khan kan chhuak miah lo a ni," a ti. 

Positive contact dang pahnih chu Bawngkawn mi - mipa kum 69 leh hmeichhia kum 35-a upa an ni a, Zangena Filling Station-a thawk zinga Covid-19 vei hmuh chhuah hnua a kài chhàwn theihte chhuina kal zela endikte an ni. Bawngkawn LTF secretary Lalberchhandama chuan Vang­laini zawhna chhangin, an venga Covid-19 veite'n an kài chhàwn theiha ngaihte nimin khan an chhui nghal tih a sawi a, "Chhui tur a tam viau a, kan inchhui ṭha viau. Vawiin (nimin) hian mi 50 velte swab sample lâk nghal a ni," a ti a; mipa kum 69 mi zawk chu August 23, Pathianni khan mitthi ràlnaah a kal thu a sawi.

Zangena Filling Station-a thawk pakhatin Covid-19 a vei vanga chhui zuinaah Khanpui khaw mi police, Saipum, Kolasib ditrict-a awm mekin hripui a kái tih hmuh chhuah a lo ni tawh a; police-in a kai chhàwn theiha ngaihte chhui zuina aṭanga swab sample endik zinga mi Zemabawk mi pali chuan Covid-19 an vei tih Ningani khan hmuh chhuah a ni. Zemabawk mite hi mipa leh hmeichhia pahnih ve ve an ni a, kum 20-55 inkar niin, home quarantine-a awm mek an nih thu, sorkar thuchhuah chuan a tarlang.

Vanglaini zawhna chhángin Zemabawk LTF secretary Zorammuana chuan, an veng mi Covid-19 veite chu an kàina âwm a chian nghal thu a sawi a, "Saipûma police kha mitthi inah a kal a, chumi aṭanga inkài chhâwng ta chu a nih hmel," a ti. Contact tracing aṭangin mi 57-te swab sample endik a ni a, mi paliin hripui an kai a, mi palite'n an kài chhàwn theih âwmte pawh an chhui mek thu a sawi bawk.