Sawhthing tâm beihpui thlâk ṭan; Chhungkaw 6,586 sawhthing a tám tawh

Sawhthing tám beihpui thlâkna tura Horticulture department hmalakna 'Operation Ginger 2024 - Fehchhuah Runpui' chu nimin zing khan Horticulture minister Prof. Lalnilawma'n Horticulture directorate kawt aṭangin a vailiam a, district dangah bawrhsapte'n an vailiam bawk. Mizoramah chhungkaw 6,586-te sawhthing a tám tawh.

Operation Ginger 2024 - Fehchhuah Rûnpui kaltlang hian August 2024 chhungin sawhthing tâm awmna khuate tlawh chhuah a, invên leh enkawl dan turte zirtir tum a ni. Horticulture department-a thawkte chu district tin tuamin an feh chhuak dawn a, sawhthing natna te, a bâwmtu rannung leh enkawl dan chungchang ziahna lehkhabu an sem zel dawn a, enkawlna damdawi a theih angin ngaihtuah mek zel a ni.

Horticulture Minister chuan, sawhthing tám vanga mangangte ṭanpui tura feh chhuakte chu theihtawp chhuah turin a chah a, "Sawhthing hralhna market thlen hma, a chìn leh enkawl chhung zawng chu department kutah thui tak a innghah tlat avangin thlai chìnna hmunah ngei loneitute harsatna enfiahin a remchan dan ang zela puih tum a ni," a ti.

Sawhthing quintal nuai 10 chuang thar thei tura beisei a nih thu sawiin Prof. Lalnilawma chuan, "Operation Ginger hian sawhthing chíngtu harsatna tâwkte ṭanpui turin Horticulture department thawktute an awm reng dawn tih a entir a, loneitute pui turin department thawktu a tê ber aṭanga minister thlengin kan inpeih reng," a ti a; harsatna leh mamawh an neihte inthlahrung loa thuneitute hnena thlen zel turin sawhthing chíngtute a chah.

Aizawl aṭanga feh chhuak turte hian Aizawl, Serchhip, Hnahthial leh Saitual district-te an tuam dawn a; Horticulture deputy director Dr Robert Lalrinsanga'n Saitual district team a kaihruai a, deputy director Dr H Vanlaldiki'n Aizawl district team, deputy director Dr Jenny Zoremtluangi'n Serchhip district team leh assistant director Emelyne Lalmawipuii'n Hnahthial district team an kaihruai thung.

Horticulture Minister hian nimin khan Ṭhiak khuaa sawhthing chíngtute harsatna tawh dan a hmunah a enfiah bawk.

Sorkar thuchhuah tarlan danin, Horticulture department chuan kumin July thla tàwp lam aṭang sawhthing tám thu an dawng ṭan a, a theih ang angin hma an la nghal. District tina aṭanga report lut aṭanga hriat theih chinah khua 263-ah chhungkua 25,102-in sawhthing an ching a, chhungkaw 6,586-te sawhthing a tám tawh a ni.