Police uniform hâk laia mei zûk leh zu ruih hi thil dik lo a ni - Home Minister

Home minister K Sapdanga chuan nimin khan Thingkaha 3rd IR Battalion headquarters a tlawh a; uniform hâk laia meizûk leh zu ruih chu thil dik lo hul hual a nih thu a sawi.

K Sapdanga chuan, police-te'n taksa hrisel tak an neih a ngaih thu sawiin, "Rilru leh taksa hrisel nei lote tan police hna thawh a harsa. Uniform hâk laia meizuk emaw, zu ruih emaw hi thil dik lo hul hual a ni a, police mi leh sa reng reng zûk leh hmuam, zu leh ruihho lakah fihlim tlat tur a ni," a ti a, hriselna ngai pawimawh turin a chah.

Mizoram chu India rama state ralmuang ber a nih rualin, ralmuannain inthlahdahna a ken tel fo thu K Sapdanga chuan a sawi a, "Police-te nunah inthlahdah loh leh inring renga awm a bet tlat tur a ni. Battalion-te dinhmun bakah mahni hna thawk ṭha duh lo leh thawk thei lote zir chian mek a ni a, battalion pakhata awm reng theih a ni lo," a ti a; a ṭul dan anga insawn a ngaih cháng a awm thu leh a ṭul ang zela hmalak a nih dawn thu a sawi.

Home Minister chuan, eiruk donaah sorkar a ṭang hle tih sawiin, "Sum leh pai chauh ni lo, kan hun hman dan nen lam hian eiruk theih a ni a, sorkar hnathawk inthlahdah takte hian eiruk bul kan ṭan a, sum leh pai duhâmnaah kan lut fo. Mahni invên nachang i hria ang u, tute mah inthlahdah a thiang lo, sorkar tharah a chhe lai siamṭhatu lo ni ang che u," a ti.

K Sapdanga chuan, 3rd IR-ah mi 408 an awm a, post ruak 510 lai a awm chu vei tham a tlin thu leh a awm sa zinga mi 104 lai hmun danga dah an ni chu a hriatthiam loh thu sawiin, sorkarin police hna ruak 300 hnawhkhat turin ruahmanna thui tak a kalpui tawh thu a sawi a; police-te inkarah inpawh tlânna ṭha leh hriselna ngai pawimawh tura inzirtirna atan Police Sports Meet buatsaih a nih dawn thu a sawi bawk.

DIG (Southern Range) C Lalthanmawia pawhin thu sawiin, "Mizoram Police hnuaiah armed leh un-armed police awm mah ila, inpumkhat vek kan nihna hriat reng a pawimawh. Kum kal mekah police 90 lai kan inchán tawh a, hriselna kan ngaih pawimawh thar a ṭulzia a lang," a ti.

3rd IR Battalion hi kum 2007-ah din a ni a, April 12, 2023 khan tuna an awmna Thingkah an luah ṭan a, mi 304 an awm mek a ni.

Home Minister hian Lawngtlai SP office pawh a tlawh a; Lawngtlai mipui ralmuang taka an awm theih nana thâ thlah loa thawktu Lawngtlai SP leh a thawhpuite fakawm a tih thu sawiin, "Khawtlanga muanna awm tura mipui innghahna ber pakhat in ni tih hre reng u la, mipui innghah ngamna ni turin hrisel tak nih a ngai a, theihtawpin in hriselna vawng ang che u," a ti.

Lawngtlai SP R Lokeshwaran tarlan danin, Lawngtlai district-ah sub-division pahnih - Lawngtlai leh Chawngte a awm a, police station pangaah police 131 an awm mek a ni.

Minister K Sapdanga hian nimin vêk khan Hnahthialah mipui tan amah dawr theihna hun a siam a; Hnahthial leh a chhehvel khuaa mi eng emaw zatin an mamawhte an thlen a ni.