Mizo tlangval Maj. Laldingngheta'n sipai huaisen chawimawina a dawng

India sipai officer huaisen, mi firfiak pahnih kâp hlumtu Maj. Laldingngheta (30) s/o Vanlalhriata, Bungkawn Vengthar, Aizawl chu sipai huaisen chawimawina Sena Medal (gallantry) August 15, Independence Day khan hlan a ni.

Maj. Laldingngheta hi Madras Rifles-a awm niin, tunah hian Rashtriya Rifles 8th Battalion-ah a awm mek a; nikum October thla khan Jammu & Kashmir-ah firfiakte nena an inkahnaah huaisen taka a chet avangin Sena Medal hlan a ni.

Thu dawn dain, Maj. Laldingngheta leh a kaihhruai Combat Action Team chuan report an dawn bawhzuiin October 21, 2023 tlai dar 3 velah Line of Control kân mek mi firfiak pali an hmu a; ṭanhmun remin an lo châng a, mi firfiakte nen chuan an inbei ta a, Maj. Laldingngheta hian firfiak zinga pakhat a kâp hlum.

Firfiakte'n an kah lêtnaa grenade puakah Lalding­ngheta chu a chuap, a lu leh a mit dinglam a hliam a; grenade puak them pathumin a thluak a pawh a ni. A bán puam ding­lama kah fuh a ni bawk.

Na taka a hliam chungin a naute chu a ho zel a, huaisen takin an bei zui zel a; firfiak damte chu LoC lamah an tlân let a, chu chu Maj. Laldingngheta chuan a ûm zui a, firfiak pakhat a kâp hlum leh a ni.

Maj. Laldingngheta hi a hliam a nat tham avangin Srinagar lamah helicopter-in lak a ni a, chumi hnuah RR Hospital, Delhi-ah enkawl leh a ni.