Lengpuiah hnam dangte'n vawk farm liam siam an tum - MIPFA

Mizoram Pig Farmers Association (MIPFA) chuan nimin khan thuchhuah siamin, Lengpuiah Mizo hmunhma hawhin hnam dangte'n vawk farm liam tham tak siam tura hma an lak mek thu leh ṭha lo an tih thu an tarlang. Hetih lai hian, state pawn aṭanga vawk leh vawksa la lut Malsawmi chu thuneitute'n an man tawh.

MIPFA chuan, Mizo ṭhalai tam takin loan-te lain vawk vulha eizawng turin hma an la mek tih sawiin, "Mizo farmer-te'n an thar chhuah tual vawksaa intodelh tura theihtawp an chhuah laiin ram dang mi, Korean leh state pawn vaite'n Mizo thurualpuiin Lengpuiah Mizo hmunhma hawhin vawk farm lian tham siam tumin hma an la," an ti a; chumi chungchang chu Mizoram sorkarah an thlen tawh thu an sawi.

Hnam dangin Mizorama vawk vulh tura hma an la chu ṭha lo an tih thu tarlangin MIPFA chuan, "A dan kawngah theihtawp chhuaha hmalak chhunzawm zel kan tum," an ti.

Hetih lai hian, Aizawl District Magistrate chuan MIPFA aṭanga complaint a dawn angin, state páwn aṭanga dan loa vawk leh vawksa la luttu Malsawmi, Star Farm neitu chu Disaster Management & Rehabili-tation department order dt. 13.5.2024 a bawhchhiat avangin man turin Aizawl SP a chah. Star Farm neitu Malsawmi hi police-te'n an man tawh nia thu dawn a ni.

Malsawmi man chungchangah hian MIPFA chuan, July 2, 2024-a press conference-a vawk leh vawksa Mizoram pawn aṭanga lak luh Mizoram sorkar khap theih a nih loh thu sawitu man a ni chu lawmawm an tih thu an tarlang a, "Mizorama vawk vulhtute mittui titlatu en liam mai mai lotu sorkar chungah lawmthu kan sawi," an ti. Dan loa vawk, vawksa leh vawk aṭanga siam la lut ṭhin mi dangte pawh ti tawh lo tuin an ngen bawk.