Doctor leh damdawi-inte'n lungawi lohna lantir dawn

Indian Medical Association (IMA), Mizoram State Branch chuan RG Kar Medical College & Hospital, Kolkata-a medical post graduate zirlai hmeichhia August 9, 2024-a pawngsual leh thah chungchanga vawiin August 17 zing dar 6 aṭanga India ram puma darkar 24 chhung lungawi loh lantirna an zawm ve dawn thu an puang.

IMA, Mizoram State Branch chuan thuchhuah siamin, RG Kar Medical College & Hospital-a zirlai pakhat chunga thil thleng chu IMA-in an dem tak zet thu an tarlang a, "IMA Gen. Hqrs chuan August 17 zing dar 6 aṭanga August 18 zing dar 6 (darkar 24) chhung hian India ram pum huapin medical service zawng zawng (emergency tiam loin) titawpa nawrhna neih ni se a ti a. IMA Mizoram State Branch pawhin kan thlâwp a ni," an ti.

IMA tarlan danin, darkar 24 chhung lungawi lohna lantir chhungin Mizorama sorkar, mimal leh kohhran damdawi-in zawng zawngah emergency service chauh hawn a ni dawn a, OPD-ah doctor an ṭhu dawn lo. Medical service tihtawp hian private clinic-te pawh a huam vek dawn a ni.