Bawngkawn leh Durtlang kawng kama in sak leh lei laihte thuneitute'n an endik
Geology & Mining department, Aizawl Municipal Corporation leh sorkar thuneitu dangte chuan nimin khan Bawngkawn leh Durtlang Leitan inkar kawng kama in sakte leh lei laihte chhunzawm zel chi a nih leh nih loh an endik.
Bawngkawn-Durtlang inkar kawngpui kama lei laih leh hmalakna hrang hrang chungchangah hian Gauhati High Court Aizawl Bench chuan PIL (suo moto) no. 2/2024 hmangin August 8, 2024 khan thupek a chhuah a; chumi bawhzui chuan sorkara thuneitute'n nimin khan an endik a ni.
Nimina joint inspection-ah hian Geology & Mining department, UDPA department, Aizawl DC leh AMC aiawhte an tel a; lei laihna leh in sakna hmun leilungte an enfiah a ni. An zirchianna aṭanga an hmuh chhuahte hmangin report an siam dawn a, an sawiho hnuah an hmuh dante chu Gauhati High Court-ah an thehlut dawn a ni.
Bawngkawn-Durtlang kawng kama in sak leh lei laih chungchangah hian Indian National Trust for Art and Cultural Heritage (INTACH), Mizoram Chapter convener Rin Sanga chuan Gauhati High Court-ah PIL a thehlut a; High Court chuan July 18, 2024 khan order tichhuakin, Bawngkawn-Durtlang inkar kawng kama leimin vangin suo moto-in thubuai a siam bakah, AMC-in in sak phalna leh lei laih phalna a pekte chu a ṭhiat (cancel) a ni.
Gauhati High Court hian Bawngkawn-Durtlang inkar huam chhunga AMC-in lei laih leh in sak phalna a pek tawhte a ṭhiah bakah, in sak mekte pawh chhâwng khat an la sak pum loh chuan titawp nghal turin a ti a; Aizawl DC leh Aizawl SP chu chawlhkar hnih chhungin in sa leh lei laite'n an chawlhsan leh chawlhsan loh High Court-a report thehlut turin a hriattir bawk.
Chumi hnuah, August 1, 2024 khan AMC chuan Bawngkawn-Durtlang inkara Protected Area chhunga phalna nei loa in satu pakhat, K Zasanga, Ramhlun North lakah Bawngkawn Police Station-ah first information report (FIR) an thehlut a ni.