KHAWTHLIR

KṬP-in thisen pe

KṬP, Dinthar Vengthlang Branch chuan nimin khan an kohhran hall-ah thisen pek an huaihawt a, Civil Hospital, Aizawl tan thisen unit 36 an pe a, petute mipa 28 leh hmeichhia pariat an ni.

ESI check-up camp

Employees' State Insurance (ESI) Dispensary, Aizawl chuan Independence Day pualin nimin aṭang khan ESI hnuaia inziak lut zinga kum 40 chung lam tan Annual Health Check-Up Camps an buatsaih ṭan. Camps chhunga inentirte hnenah a thlawnin damdawi pek a nih bakah, laboratory-a enfiah ngaite a thlâwna endik a ni a; Camp hi September 13, 2024 thleng neih a ni ang.

Kuhva rah khap

Kuhva rah tawlh rûk chungchangah Khawzawl leh Hnahthial district bawrhsapte chuan thuchhuah an siam a; an district chhungah dan loa kuhva rah phurh luh khap a nih thu an tarlang. Khawzawl DC chuan, an district-ah kuhva rah tawlh ruk dah khâwlna tur kudam sak khap a nih thu a tarlang bawk.

Drug Free India Campaign buatsaih

Central Bureau of Commnication (CBC) Field office, Aizawl chuan nimin khan Ch Chhunga Higher Secondary School-ah Nasha Mukt Bharat Abhiyan (Drug Free India Campaign) an buatsaih a; ruihhlo ti lo turin zirlaite an intiam. Campaign-ah hian CBC Field office Aizawl incharge Lalginlen Lhouvum, Ch Chhunga HSS leh CBC office aiawhte leh Johnson College assistant professor Dr C Lalhmingliana ten thu an sawi a ni.

Dan thar zirho

Mizoram State Legal Services Authority chuan nimin khan Institute of Advanced Studies in Education, Aizawlah criminal law pathum zirhona an buatsaih a; Legal Aid Cell member Lalhlimpuii Ralte-in a kaihruai a; civil judge HT Lalmawizuala'n Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam chungchang a sawifiah a ni. MSLSA hian nimin khan Saitualah criminal law thar inzirtirna an buatsaih bawk.

Ambulance hlân

Mizoram Rural Bank chairman Sheryl L Vanchhong chuan nimin khan CSR aṭanga an lei ambulance chu Mizoram University hnenah a hlan. MRB Chairman hian nimin vek khan MRB, MZU Branch hmunhma thar a hawng bawk a, MZU vice chancellor Prof. Dibakar Chandra Deka-a'n a ṭawiawm.

Home tlawh

Mizoram State Commission for Protection of Child Rights (MSCPCR) chairman Jimmy Laltlanmawia leh member-te chuan nimin khan Durtlanga Special Home leh Observation Home an tlawh a, naupangte nen an inkâwm. Mipa awmna Special Home-ah naupang 18 an awm a, mipa awmna Observation Home-ah naupang pariat awmin, hmeichhe awmna Special Home leh Place of Safety-ah naupang pariat an awm mek bawk.

Thing phun

Mizoram Pollution Control Board leh YMA, Durtlang Branch chuan nimin khan Mission LiFE (Lifestyle for Environment) hnuaia ‘Ek Ped Maa Ke Naam - Plant 4 Mother’ campaign pualin Durtlang Bungmual thlânmualah thing phun rûnpui an huaihawt a, thing ṭiak 110 an phun. Mizoram EIACP Hub leh Sericulture department chuan nimin vek khan silk pangang thing 50 an phun bawk.

Zirhona buatsaih

Nimin khan Irrigation and Water Resources auditorium-ah National Space Day (August 23) pualin 'Emerging space technology, appplication in water resource management' tih zirhona buatsaih a ni a, Irrigation and Water Resources minister PC Vanlalruata'n a hmanpui. Prime minister Narendra Modi chuan India thla lem (satellite) Chandrayaan-3 in thla (moon) leilung a rah ní August 23 chu National Space Day atan a puang a ni.

Scho-ah hnâwl awm

Mizoram Scholarship Board chuan, tribal scholarship chungchangah National Scholarship Portal-in 2023-24 AY tribal scholarship diltute zingah chhan hrang hrang vanga dilna hnâwl eng emaw zat a nei tih an tarlang a, "Reject list msb.mizoram.gov.in ah en theih a ni," an ti. Zirlai hnawlte chu a ṭul anga siamṭhat ngaite siamṭha turin an chah a, harsatna nei tan MSB office-ah zawh fiah theih a nih thu an tarlang.