Chhui chian kan ngam tak meuh - Tawnluia

MNF National Core Committee member Tawnluia, senior vice president hlui chuan, ration card var tana buhfai man tihsan chungchangah thu dik lo hmanga MNF puhah ZPM party a puh a; MNF sorkar laia an thil tihte chhui chian an ngam thu a sawi bawk.

Tawnluia hian nimin khan Mizo Hnam Rûna inkhawmah thu sawiin, ZPM-in sorkar kal tawhte chu eirûkna leh thil chhe tinrengah an puh niin a sawi a, "MNF chuan kan kut phuar a nih lai ngei hian kan sorkar laia kan thil tihte chhui chian kan ngam a, min chhui rawh se. Dâwt thu belhchian dâwl lo hmanga min beihna hi thu dik pho lang turin an sorkar tha chakna hmang hian ZPM che chhuak se la, chhui chian kan ngam tak meuh a ni," a ti.

MNF sorkar laiin ration card vara buhfai leina man tihsan chungchanga rawtna ngaihtuahtu tur Cabinet-in sub-committee a din tih sawiin Tawnluia chuan, "Uluk taka ngaihtuah a nih hnuin committee hian tihpun turin recommend (rawtna) a siam lo a, Cabinet-ah pawh report pek luh a la ni lo," a ti a, inthlan puan zui a nih thu a sawi.

Tawnluia chuan, MNF hun laiin buhfai man tihpun a nih loh thu sawiin, "ZPM sorkarin October 2024 aṭanga tihpun a tum avanga MNF min puhna hi thu belhchian dâwl lo a ni. Khawiah nge MNF sorkarin buhfai rate tihpunna order a siam chu rawn lek chhuak rawh se. Keini chuan mipui dinhmun zir chiang chung zelin buhfai rate hi kan sorkar chhungin kan tipung lo," a ti.

MNF Senior Vice President hlui chuan, Zampui tlangdunga Phuldungsei chu Mizoram state chhung a nih thu sawiin, "MNF sorkarin ration card kan pe a, village council pawh kan pe. Ration Card Management System (RCMS)-ah verified & approved vek an ni. ZPM sorkarin ration card a paih hi hnam inpumkhatna atana pawi khawihna lian tak a ni a, MNF chuan kan pawm thei lo," a ti a; Tripura-in an state-a rîn luh an tum Phuldungsei chu lak lêt a nih hma chu an bei dawn niin a sawi.