Mizoram sorkarin Phuldungsei a hawisan dawn lo - Muanpuia Punte

Adviser to chief minister Lalmuanpuia Punte, MLA chuan August 15, Ningani khan Zampui tlangdunga Phuldungsei khua a tlawh a; Phuldungsei khua chu Mizoram sorkarin a ngaihsak thu leh a hawisan dawn loh thu a sawi.

Lalmuanpuia Punte hi VC president Lalnuntlingi inah khawtlang hruaitute nen an inkâwm a, Phuldungsei khuaa mi ṭhenkhat ration card aṭanga tun hnaia paih chungchang a sawifiah a ni.

India ram pumah 'One nation, One ration card' kalpui mek nih thu sawiin Lalmuanpuia Punte chuan, "Mizoram leh Tripura-a awm kawp in lo awm avangin khawl (system) aṭangin harsatna a awm a, Mizoram lamah awm vek turin kan duh che u a, Mizoram mi in nih avangin Tripura lama ration card nei tawh lo a, Mizoram lama nei vek turin kan duh che u," a ti.

Lalmuampuia Punte chuan, "Tripura leh Mizoramah ration card neih kawp ṭâlh in duh a nih pawhin kawng danga in neih theih dan tur (manual ration card) ngaihtuah pawh Mizoram sorkar chu a inhuam. Mizoram sorkar hi in nu leh pate kan ni a, nu leh pain fate an kalsan ngai lo, eng kawngah mah kan kalsan ngai lo ang che u," a ti a; India ramah ration card thliar fel mek a nih thu leh Mizoram hmun dangah pawh hmun khat aia tama awm kawpte thliar mek a nih thu a sawi.