Electric current-in man hlum

Joseph Lalbiakkima (42) h/o Chawngthanzami, Zamuang, Mamit district chu electric current-in a man avangin August 15, Ningani tlai khan a thi.

Thu dawn danin, Joseph Lalbiakkima hian an kawtah garage a nei a, chumi chhak lamah chuan electric 11KV line ban a awm a, ban pawh nghehna hrui (thir) chu garage bang nen insi deuh thawin leiah phûm a ni.

Joseph Lalbiakkima leh mi dang pakhat chu August 15 khan garage chhungah hna an thawk a, chutih lai chuan ruah a sur a, thli a thaw bawk a, 11KV line aṭanga electric hrui inthlung chu oil palm hnah nen inmanin, a kâng a; chumi avang chuan electric hrui pakhat chu a chat a, hrui chuan electric ban a si a, banah leh ban pawh nghehna hruiah chuan electric current a kal ta a ni.

Lei a huh avangin leiah pawh current a kal a, Joseph Lalbiakkima chu current-in a man a, Kawrthah damdawi-in panpui ni mah se, a hliam tuar loin a thi a ni. Garage-a a awmpui pawh current-in a man a, ani pawh Kawrthah damdawi-in panpui a ni a, ngaihtuahawm a ni lo nia thu dawn a ni.