Minister-in lei min leh tlahniam a enfiah

Disaster Management & Rehabilitation minister K Sapdanga chuan nimin zing khan Kaladan Multi-Modal Transit Transport Project (KMMTTP) kawnga leimin te, Lawngtlai khawpuia lei tlahniam leh Recreational Centre sakna tur hmunhmate a tlawh a; "Leivung paih danah NHIDCL-in dan eng emaw bawhchhiat an nei ngei niin a lang," a ti.

DMR Minister-in leimin vanga KMMTTP kawng chhia a tlawhnaah PWD hotute chuan, leimin chu fûr ruahtui tlâk tam vang bakah, a chhak lama NH-54 kawng laitu NHIDCL-te leivûng paih fimkhur loh vang nia an hriat thu an lo hrilh. PWD bakah, Lawngtlai DC pawhin NHIDCL chu an leivûng paih dan fimkhur turin vawi tam an chah tawh thu an hrilh bawk.

K Sapdanga chuan, kawngpui ṭha nei turin sorkarin theihtawp a chhuah tih sawiin, "Hna thawktute'n ṭha taka hna an thawh a ṭul a, leivûng paih danah phei chuan fimkhur a ngai hle. NH-54 kawng laih vanga KMMTTP kawngin harsatna a tâwk ṭhin hi thil ṭha lo tak a ni a, NHIDCL hian dan eng emaw bawhchhiat an nei ngei niin a lang," a ti a; NHIDCL hotute sawipui a tum thu a sawi.

Lawngtlai-III leh Electric Venga lei tlakhniamna hmun a tlawhnaah K Sapdanga chuan, khawtlang hruaitute'n concept note an buatsaih chu chiang zawka zir a, a theih ang anga hmalak leh bawhzui a tum thu a sawi.

Lawngtlai Chandmary thlanmuan bula 'Chandmary Recreational Centre' sak tura ruahman a tlawhnaah khawtlang hruaitute chuan, sorkarin DPR a siam tawh chu sum leh pai sèn tura tih a tlem deuh nia an hriat thu sawiin, bawhzuisak turin Minister an ngen. Minister chuan, a ṭul dan anga hmalak leh en zui a tum thu a hrilh.

DMR Minister hi Lawngtlai East bialtu MLA Dr Lorrain Lalpekliana Chinzah, adviser to chief minister (health & family welfare)-in a ṭawiawm a ni.