Râltlánte Mizo ṭawng zirtirna hawng

Central YMA leh Mizo Literature and Language Teachers' Academy (MILLTA) chuan nimin khan Falkland Venga RAY Hall-ah Manipur aṭanga Zo hnahthlak ráltlânte tan Mizo ṭawng inzirtirna an buatsaih ṭan a, CYMA president Lalhmachhuana'n a hawng.

Hawnna inkhawm hi CYMA vice president Prof. Lalnuntluanga'n a kaihruai a, CYMA general secretary Prof. Malsawmliana'n Mizo ṭawng buatsaih chhan leh kalpui dan turte a sawifiah.

CYMA President chuan, raltlante Mizorama zirtirtu thiam rualin Mizo ṭawng an zirtir tur chu an vanneih thu sawiin, "Mizo ṭawng hi inbiakpawhna atan mai ni lo, hnam inpumkhatna atan a pawimawh," a ti a; chhuanlam ho tê tê siam lo a, uluk taka Mizo ṭawng zir turin raltlante a chah. MILLTA aiawhin Prof. C Vanlalhruaia'n thu a sawi bawk.

Falkland Vengah hian Manipur aṭanga ráltlân chhungkaw 59 awmin, mi 250 vel an ni a, Manipur-a district hrang hrang aṭanga rawn lutte an ni. Ráltlânte'n Mizo ṭawng thiam an duh thu CYMA hnenah an thlen a, CYMA Literature Sub-Committee-in bawhzuiin, MILLTA nen thawhhona thuthlung an siam a, Mizo ṭawng inzirtirna an kalpui ta a ni.

MILLTA hi college-a Mizo subject zirtirtute an ni a, anmahni senso leh inpeknain chawlhkar khatah zan hnih Mizo ṭawng an zirtir ṭhin dawn a ni.