Chapchar Kût hlim taka hman a ni

Mizote kût pui ber, Chapchar Kût chu nimin khan Mizoram hmun hrang hrangah hlim taka hman a ni. A hmanna pui ber Aizawlah chuan Lammualah chief minister Lal Thanhawla hoa hman a ni.

Lammuala Chapchar Kûtah hian Art & Culture minister R Romawia chu Kût Thlengtu a ni a, chief minister Lal Thanhawla chu Kût Pa niin, Taipei Economics & Cultural Centre (Taiwan) representative Chang Kwang Tien chu khualzahawm a ni.

Kût Pa Lal Thanhawla chuan Mizoram chhung leh ram pawna Mizo zawng zawngte kût chibai a bûk a, "Kût kan hman danah ringtu kan nihna nena inmil zawnga her danglam zel a pawimawh. Hlimhlawp zawng leh huau huau zawng chauh ni loin, hnam dangte pawhin tel vena tlaka an ngaih tura hman thiam a ṭul a ni," a ti.

Lal Thanhawla chuan, Chap­char Kût chu Mizote kût pawimawh ber a nih thu sawiin, "Kan hman danah min zawng chhuaktu ropuina turin ti zel ila. Hun lo kal zel turah hnam nun pho chhuah nan te, Zo nun ze mawi vawnhim nante hmang ila, nu leh pa thuawih leh aia upa zah kawngah inzir thar nante i hmang ang u," a ti.

Chapchar Kût chu ṭha zawk leh changtlung zawka hman dan ngaihtuah zel a pawimawh tih sawiin, Lal Thanhawla chuan, "Khualzin tam zawk hîp theihna turin kût hi hman dan la ngaihtuah zel ni se. Tuna kan tih dana a famkim lo laite ngaihtuahna thar nen tiṭha zel ila. Inhawng takin i hmang ang u," a ti a; kut hmangtute chu hlim taka hmang turin duhsakna a hlan a ni.

Chief Minister chuan, kal­khawmte chu kawng tinrenga intodelh tura ṭan la turin a fuih a; rinawmna, dikna, taimakna leh Pathian ṭihna nung leh Zonunzemawi chhawm nung chunga hun hmang turin a chah bawk.

Inlawmna thu sawitu, Central YMA president Lalbiak­zuala chuan, Chapchar Kut chu Mizo hnam hrang hrangte'n inpumkhatna atan hmang thei se a duh thu sawiin, "Mizoram hi kan ram a ni a, inla hrang tur kan awm chuang lo. Hlim tak leh lungrual takin i awmho zel ang u," a ti a; chhung lam leh páwn lam aṭanga Mizoram tibuai ṭhintute lakah ngaihtuahna sên a ṭul thu a sawi.

Lalbiakzuala chuan, Chap­char Kut chu a huau huau zawng chauha hman ni lo se a duh tih sawiin, "A hlimhlawp zawng ringawt leh Mizo thuam inbelna ní ringawtah ral lo se, Zonunzemawi chawi nunna atan, mi dangte ṭanpuina atan leh tlawmngaihna lan chhuahtirna atan hman ṭangkai a ṭul. Mizo hnam nun hi pianthar san chi a ni lo a, changkân san chi pawh a ni lo," a ti.

Khualzahawm, Taipei Economics & Cultural Centre representative Chang Kwang Tien pawhin thu sawiin, mipuite kut chibai a bûk a; Mizoram nuam an tih thu te, Chapchar Kut chu ropui an tih thu leh hlimawm an tih thute a sawi. Chang Kwang Tien hi Taiwan Science Division director Chung Chang, assistant representative Hsin Chiang Hsu ten an ṭawiawm a ni.

Lammuala Chapchar Kût hmannaah hian Mizo nun zia chi hrang hrangte tarlan a ni a, zaithiamte an zai bakah, hnam lâm hrang hrang entir a ni.

India hmarchhak state tin aṭangin cultural troupe ten an hnam lâm an entir a; Kût pual hian Lammualah Zo thuam hrang hrang zawrh a nih bakah, Food Fest buatsaih a ni.