KHAWTHLIR

Sorkar laipuia Ministry of Road Transport and Highways chuan RL Rinawma, IRS (Rtd) chu zangnadawmna thubuai ngaihtuahtu, arbitrator atan a ruat. Thu dawn danin, MoRTH Arbitrator hian Aizawl, Ser­chhip, Lunglei, Lawng­tlai, Hnahthial leh Saitual district-a National Highway atana ram lâk leh zángnadawmna pek chungchanga vui­vainate court thleng loa chinfel dan tur a khawih dawn a ni.

UPC (NEI) hnuaia Penticostal Youth Department (PYD), Theiriat Bial chuan nimin khan Lunglei Civil Hospital blood bank-ah thisen unit 25 an pe.

State Referral Hospital-ah nimin khan Covid-19 vei mi 12 dah luh an ni a, chu'ngte nen chuan hripui vei vangin mi 75 an enkawl mek. SRH-ZMC Bulletin tarlan danin, SRH-ah hian ICU leh SICU-ah mi pahnih ve ve awmin, a bak zawng Isolation ward-ah an awm. ICU-a awmte ngaihtuahawm an ni lo a, ward-a awm zingah khawsik sáng vak lo nei pahnih an awm a, SICU-a awmte'n harsatna an nei lo.

MSU district headquarters, Mamit chuan thuchhuah siamin, Mizoram University-in September 1-21, 2020 chhunga online/offline hmanga under graduate even & odd semester examination a buatsaih turah, Mamit district-a zirlaite'n network ṭhat loh vanga harsatna an tawh loh nan internet ṭha zawk pe turin network provider-te an ngen.

Dr Isak Ramnunsiama, Kepran khua chu Covid-19 veite enkawlna Covid Care Centre (CCC), Darlawna hlawh nei loa thawk turin a inpe. Darlawn CCC-a thawk tur hian mi dang pawh inpe an awm tawh a, CCC enkawltu Dr JH Vanlalnunmawia chuan, nurse pahnih leh health worker pahnih an la mamawh belh thu a sawi.

State Election Commission chuan, August 26, 2020-a Mara Autonomous District Council (MADC) Siaha North-I bialah by-election a buatsaiha vote tlate chu nimin khan chhiar a ni a, vote 565 hmutu MNF candidate Nahlo Solo a tling. Candidate dang vote hmuh dan chu - B Zahra, BJP-in 558 leh N Alfred, INC-in 239 a ni.