Horticulture Centre of Excellence hawng

Horticulture Mission for North East and Himalayan Region (HMNEH) hnuaia, Serchhip huam chhung Lunglei zaua Horticulture Centre of Excellence din thar chu Ningani khan chief minister Lal Thanhawla'n a hawng.

Chief Minister chuan, hma­sawnna chu hmasialna tel loa rualkhai taka mi tin, khaw tin leh kil tinah thleng se an duh thu sawiin, "Hnam zahawm leh ropui ni tur hian ei leh barah leh sum leh paiah kan intodelh a ngai," a ti a; Centre of Excellence aṭanga tanpuina dawngtute chu mite entawntlaka thawk tura chah.

Lal Thanhawla chuan, Centre of Excellence chu lo neitute ṭan­puitu tur leh a ṭul anga zirtirna petu tur an nih tih sawiin, "Lo neitute tana thil ṭha ber ber awmna a ni dawn a, zir tur tam tak awmna tur leh mite tana tha tur eng nge an thawh ang tihte ngaihtuahna a ni dawn a ni," a ti.

Khualzahawm, Horticulture minister PC Lalthanliana pawhin thu sawiin, "Loneitute'n hma an sawn theihna turin technology thar ber zel an hman theih nan sorkar chuan hma a la reng a ni," a ti a; Mizoram hmasawnna turin dik chu dik ti ngam a, dik lo chu dik lo tih ngam a ṭul thu a sawi.

Horticulture Centre of Excel­lence din nan hian HMNEH aṭangin cheng nuai 500 hmuh a ni a, cheng nuai 275 chu infrastructure siamna atan leh nuai 225 chu loneitute tana tih a ni. Loneitu tinte'n tui dah khawlna, thlám leh terrace an siam a ni.