Khawlianah police leh HPC(D) an inkâp

March 5, Ningani zan dar 7 rîk hma deuh khan HPC(D) nia rinten Khawlian khuaa Mizoram police out-post an kâp a, police-te'n an kâp let ve nghal. He inkahnaah hian HPC(D) leh police lamah thi leh hliam tuar an awm hriat a ni lo.

Thu dawn danin, HPC(D)-te hian metre 200 vela hla aṭangin Khawlian police out-post hi an kâp a, police lamin kâp let ve nghalin, minute 10 vel an inkah hnuah HPC(D)-te chu an insaseng a ni. HPC(D)-te hian silai mu vawi 100 chuang an hmet puak hman a, an inkah zawh hnuah Manipur-ah an insaseng a ni.

He thil thleng avang hian Khawlianah hian police ṭhahnem tak tirh belh nghal a ni a, HPC(D)-te hian ramrî an kân tawh avangin ûm zui an ni lo.

Police aṭanga thu dawn danin, HPC(D)-te hian eng vanga police-te hi bei an ni nge tih hriat a ni lo a, V/C inthlan a hnaih avang leh tukluih chhiah sorkar hnathawk leh contractor-te aṭanga khawn an tum reng avangin thawm neih an duh vanga rin a ni.