Mizoram hmun hrang hrangah Chapchar Kût

Nimin khan district khawpui hrang hrang leh khaw dang eng emaw zatah Chapchar Kût hman a ni.

Lungleiah chuan LAD office tualah hman a ni a, DC Ashish Madhaorao More chu Kût Thlengtu a ni. Ashish Ma­dhaorao More chuan, Chap­char Kut hman theih a ni chu lawmawm a tih thu sawiin, "A hmunhmain duhthu a sâm lo deuh hi a pawi a, nakkumah chuan nuam zawkah hman theih a nih ngei ka beisei," a ti a, Mizo mipuite chu Chapchar Kût hlim leh nuam taka an hman theihna atan duhsakna a hlan.

Saihaah chuan district play­ground-ah hman a ni a, MADC CEM RT Zachono chu Kut Pa a ni. RT Zachono chuan, "Mizo­te'n kan culture vawn nun zel a nih theih nana kût kan hmang ṭhin hi a lawmawm hle. Kan pi leh pute kha lo neiha ei zawng vek an ni a, ni tin loa feh ṭhin an ni. Hei vang hian kum khat chhunga intihhlim hun kût hi uar takin an hmang ṭhin a ni," a ti.

Chapchar Kut hi Kolasib-ah chuan minister Lalrinmawia Ralte hoin Ṭumpui Field-ah hman a ni. Lalrinmawia Ralte chuan, Chapchar Kut chu Mizo ze ṭha leh pi leh pute hun aṭanga ze ṭha Mizoin a neih angte ṭhangtharte inzirtirna hun leh Mizo ro hlu, lâm, zai leh hnam ziarángte pholanna hun a ni tih a sawi a; Mizo nun ze mawite hi chawi vul a, chhawm nung a, an tu leh fate pawh zirtir a hlan chhawng zel turin kût lawm tura kalkhawmte a chah.

Lawngtlaiah chuan minister C Ngunlianchunga hoin Central YLA Hall-ah hman a ni. C Ngunlianchunga chuan, mahni hnam zia hnâwla hnam dangte zia entawn ṭhin hnam an ral ṭhin tih sawiin, "Mi dangte tih dan entawnin kan hnam hi kan tiral dawn nge, kan ze dik tak kan chawinung zelin kan ding chhuak zawk dawn tih hi mipuiin kan chhan tur zawhna pawimawh tak a ni," a ti.

Champhaiah chuan DC H Lal­engmawia hoin Kahrawt YMA Field-ah hman a ni. H Laleng­mawia chuan, "Khawvel changkang zelah kan pipute nunze mawi leh hnam zia rang kal san a ni ṭthin a, tlawmngaihna, dikna leh rinawmnate hian Mizote thinlung a chhuahsan lohna turin kan vawn nun reng theih nan kan inzirtir a ngai a ni," a ti.

Saitualah pawh Chapchar Kut hi bialtu MLA R Lalzirliana hoa hman a ni a, School Education director K Lalthawmmawia pawhin a hmanpui. R Lalzirliana chuan, hnam thil leh ziarângte chu hun inher danglam zel leh Kristianna nena her rem a ṭul tih sawiin, "Mahni hnam ze bil bo ṭhak khawpa changkan erawh chu thil hlauhawm tak a ni," a ti a; hnam changkang apiangin an pi leh pute thil an hlut tih a sawi.

Zobawk Group YMA pawhin Zobawkah Chapchar Kût hi an lawm a, an hun hmanpuitu Chalrosanga Ralte, MLA chuan, tun hma chuan Chapchar Kutah zu leh sa nen hun hman ṭhin a ni tih sawiin, "Tun hunah erawh chuan kan pi leh pute hun ang em chuan hmang tawh lo mah ila, Mizote tan chuan hun hlimawm leh nghahhlelhawm tak a la ni reng tho," a ti.