MNF ṭhalaite'n debate-ah MPCC an cho

MNF ṭhalaite chuan thuchhuah siamin, Congress party chu School Education leh Education Reform Commission(ERC) report tipuitling leh tihpuitlin loh chungchangah vantlang hmaa inhnial fiam (debate) puiah an cho reng tih an tarlang.

MNF chuan, Mizoram Education Policy chu kum 1998-a bul ṭan tawh a ni tih sawiin, "ERC rawtna vanga din a ni lo. Congress sorkar hmasa, March 1998 khan education consultant Dr LN Tluanga hoin draft Education Policy atan consultation programme an nei daih tawh a, Education minister Dr R Lalthangliana hun laiin Mizoram Education Act, 2003 chu March 28, 2003 khan Assembly-ah pass a ni tawh," an ti.

ECCE leh CCE-te chu Mizoram chhung bika kalpui ni loin, Central policy a nih thu leh ERC rawtna vanga kalpui a ni lo tih an sawi a, "ERC din ve lo India ram state dangte pawhin an kalpui daih tawh zawk a ni," an ti. Voluntary Retirement Scheme (VRS) chu ERC din a nih hma, MNF sorkar laiin kalpui a ni tawh a, MNF sorkar laipui senso tur cheng vbc. 124 pawh Asian Development Bank aṭanga pûk tura ruahman fel vek a nih thu an sawi.

MNF chuan, sikul sâwi khâwm (amalgamation) chu ERC din hmain kalpui tawh a nih thu te, vocational course chu ERC din hmaa bul ṭan tawh a nih thu te, zirtirtu training la nei lote training tir chu hun rei tak aṭang tawhin sorkar policy-a awm sa a nih thute an tarlang.